Densaýlyq saqtaý ministrligi plastikalyq hirýrgiia qyzmetin kórsetetin meditsinalyq uiymdarǵa qosymsha jospardan tys tekserýler júrgizetinin málimdedi, dep habarlaidy ult.kz.
Vedomstvonyń habarlaýynsha, tekserý barysynda zań buzýshylyqtar anyqtalsa, Qazaqstan Respýblikasynyń zańnamasyna sáikes tiisti sharalar qabyldanady.
Ministrliktiń Meditsinalyq jáne farmatsevtikalyq baqylaý komitetiniń aýmaqtyq departamentteri 2021 jyldan beri plastikalyq hirýrgiia salasynda qyzmet kórsetetin meditsinalyq uiymdarǵa 92 jospardan tys tekserý júrgizgen.
Azamattardyń plastikalyq operatsiialardyń sapasy men qaýipsizdigine qatysty shaǵymdarynyń kóbeiýine bailanysty tekserýlerdiń basym bóligi 2024 jyly uiymdastyrylǵan.
Tekserý barysynda litsenziialyq talaptardyń saqtalmaýy, meditsinalyq kómekti uiymdastyrý standarttarynyń jáne meditsinalyq qujattamany júrgizý qaǵidalarynyń buzylýy anyqtaldy. Sonymen qatar birqatar meditsinalyq uiymnyń tiisti ruqsat qujattarynsyz qyzmet kórsetkeni belgili boldy.
Anyqtalǵan zań buzýshylyqtardy joiý úshin meditsinalyq uiymdarǵa mindetti túrde oryndalýy tiis nusqamalar berildi. Budan bólek, ákimshilik quqyq buzýshylyq boiynsha 24 hattama toltyrylyp, jalpy somasy 4,8 million teńge aiyppul salyndy.
Komitet plastikalyq operatsiiadan keiin adam ólimi tirkelgen birneshe jaǵdaiǵa bailanysty da jospardan tys tekserýler júrgizgen. Mundai oqiǵalardyń basym bóligi Almaty men Astana qalalarynda, sondai-aq Mańǵystaý oblysynda tirkelgen.
Tekserý materialdary zańnamaǵa sáikes quqyqtyq baǵa berý jáne tiisti protsestik sheshim qabyldaý úshin quqyq qorǵaý organdaryna joldandy.
