Foto: primeminister.kz
Úkimet basshysy Álihan Smaiylov azyq-túlik baǵasynyń qymbattaýyna bailanysty ákimderdi sókti, dep habarlaidy "Ult aqparat" Sputnik Qazaqstan saityna silteme jasap.
"Biz byltyr qajetti qordy jinaqtap aldyq. Sondyqtan kókónis ónimderi jaǵynan tapshylyǵy bolmaýǵa tiis edi. Ákimderge baǵany ustaý úshin qajetti tetikterdiń barlyǵyn berdik, qarjy da bólindi. Biraq baǵa báribir ósip kele jatyr. Ákimdikterdiń tiimdi jumysyn kórip otyrǵan joqpyn. Jergilikti jerlerde atalǵan máselege salǵyrt qaraýdyń saldarynan baǵanyń ósýi toqtaityn emes", - dedi Smaiylov Úkimettiń búgingi otyrysynda.
Osy oraida Premer piiaz máselesin de eske saldy. Ákimderge aldyn ala kelisimshart jasaýǵa tapsyrma berilgen. Biraq olar birneshe ret piiaz jetkilikti dep aitqan.
"Óńirlerge piiazdy merdigerlikpen qamtamasyz etý tapsyryldy. Ákimder óz óńirleriniń suranysyn qanaǵattandyrdyq dep birneshe ret esep berdi.
Onda piiaz nege qymbattap jatyr? Bizde piiaz kóp ósedi. Alaida baǵany tómendetý úshin piiaz eksportyna tyiym salyp, shuǵyl sharalar qabyldaýǵa májbúr boldyq. Biz birinshi kezekte ónim óndirýshilerdi forvardtyq satyp alý mehanizmderin qaita qaradyq. Alaida ákimder jetkizýshilerge qarjy bólýdi doǵarmai otyr. Ókinishke qarai, ol deldaldardy kóbeitkennen basqa nátije berip jatqan joq", - dep atap kórsetti Úkimet basshysy.
Budan bólek, óńirlerge turaqtandyrý qorlaryn tiimdi baǵamen toltyryp alýǵa múmkindik berildi. Biraq tiimdi jumys kórinbeidi. Al biyl infliatsiianyń deńgeiin 9,5 protsentten asyrmaý qajet.
"Buǵan qol jetkizýge ábden bolady. Ol úshin tek barlyq óńirdiń azyq-túlik baǵasyn turaqtandyrý, ásirese, maýsymaralyq kezeńde baǵany ustap turý boiynsha belsendi jumysy qajet. Sizderde qajetti quraldyń bári bar", - deidi Smaiylov.
