QR Aýyl sharýashylyǵy ministrligi piiazdy syrtqa shyǵarýǵa shekteý qoiý jónindegi usynysty qoldamaidy. Bul týraly vedomstvo basshysy Erbol Qarashókeev málim etti, dep habarlaidy QazAqparat.
«Kókónis ónimderi arasynda piiazdyń baǵasy ósti. Osy oraida, ishki naryqta piiazdyń qory jetkilikti ekenin atap ótkim keledi. Máselen, ai saiynǵy qajettilik 25,9 myń tonna bolsa, búgingi kúni piiaz qory 34,4 myń tonnany quraidy. Maýsym aiynan bastap erte pisetin piiaz jinalyp jatyr. Onyń jalpy kólemi 90 myń tonnadan asady dep kútilýde. Búginde 35,2 myń tonnasy jinaldy. Shilde aiynyń sońyna deiin jáne tamyzdyń birinshi jartysynda 50 myń tonnadan astam piiaz jinaý josparlanǵan», - dedi ol ortalyq kommýnikatsiialar qyzmetinde ótken brifingide.
Sondai-aq, ministr keiingi kezde piiazdy Qazaqstan aýmaǵynan syrtqa shyǵarýǵa shekteý sharalaryn engizý máselesi talqylanyp jatqanyn eske saldy.
«Ministrlik bul máseleni qoldamaitynyn atap ótkim keledi. Qazirgi ýaqytta ministrlik Túrkistan jáne Jambyl oblystary ákimdikterimen birlesip, piiaz óndirýshiler men ózge oblystar, qalalar ákimdikteri arasynda kelisimsharttar jasasý jumystaryn júrgizýde. Kezdesý qorytyndysy boiynsha piiaz satý baǵasy kelisine 220 teńgeden 110 teńgege deiin tómendedi. Sonymen qatar, qyrkúiekten bastap kúzgi piiazdy jinaý bastalady. Onyń kólemi 1 mln tonnadan astam bolady dep boljanyp otyr. Ol ishki naryqtyń qajettiligin tolyq kólemde qamtamasyz etedi. Osylaisha, piiaz kóleminiń jetkiliktiligin jáne shekteý sharalaryn engizýdiń qajeti joq ekenin atap ótemin», - dedi Erbol Qarashókeev.
