QR Premer-Ministriniń orynbasary Eraly Toǵjanov «Phizer vaktsinasy nelikten bárine qoljetimdi emes?» degen suraqqa jaýap berdi, dep habarlaidy QazAqparat.
«Keshe áleýmettik jeliden oqyp qaldym, Phizer vaktsinasyn salý úshin azamattarymyz Qyrǵyzstanǵa baryp jatyr. TMD elderinde Ózbekstanda Phizer egýge múmkindik qarastyrylǵan. Nege bizdiń Úkimet reseilik Sputnik-ke jabysyp qalyp Phizer barlyq azamatqa birdei qoljetimdi etpei otyr?», - dep suraq qoidy jýrnalist Premer-Ministr orynbasaryna.
«Nege Phizer-ge jabysyp otyrsyz? Qazaqstanǵa 4 mln Phizer dozasy jetkizildi. Ony 12-18 jastaǵy balalarǵa, júkti áielderge beremiz dep otyrmyz. Nege deseńizder, Dúniejúzilik densaýlyq saqtaý uiymynyń arnaiy sheshimimen sol azamattarǵa salýǵa rusqat berilgen keiin ákelip otyrmyz. Phizer-diń bizge bergen arnaiy sheshimi boiynsha, búginde Phizer-di satýǵa jol joq, olar osyndai ózderiniń sheshimderin shyǵarǵan. Al eger kei adamdar basqa memleketterge tyǵylyp baryp, basqa quityrqy joldarmen sheship jatsa, men oǵan jaýap bere almaimyn. Biraq Qazaqstan boiynsha Phizer kompaniiasyna bailanysty bizdiń qarym-qatynasymyz osyndai. Sondyqtan, Sputnik-ke jabysyp otyrǵan eshkim joq. Eń aldymen DDSU ruqsaty berilgen Sinopharm týraly aityp otyrmyz, onymen kez kelgen memleketke barýǵa bolady. Olardyń da 2 mln astamy bar. Ózimizdiń QazVac bar. Sondyqtan paidalanýǵa múmkindik bar ǵoi, sonyń bárin eskereiik te», - dep jaýap berdi Eraly Toǵjanov.
Óz kezeginde tilshi azamattardyń jalpy vaktsina saldyrmaýynyń sebebi – reseilik Spýtnik pen qazaqstandyq Qazvakqa senbeýi ekenin aitty.
«Kóp adamdar Phizer-di paidalanǵysy keledi. Phizer bárine qoljetimdi bolsa, azamattar ekpe saldyrýdan qashpas edi ǵoi. Nege osyny sizder áý basta eskermedińizder?», - dedi jýrnalist.
«Sonda Qazaqstanǵa tek Phizer-di ákelýimiz kerek pe, sizdiń oiyńyzsha? Qalai dep oilaisyz?», - dep qarsy suraq qoidy Toǵjanov.
Jýrnalist tańdaý múmkindigi bolý kerektigin aitty.
«Tańdaý múmkindigi bar. Azamattardyń bárine múmkindik berip otyrmyz, 60 jastan asqan 1 million adamnyń da múmkindigi bar», - dedi Eraly Toǵjanov.
