Petropavl halyqaralyq áýejaiy «Air Astana» áýe kompaniiasynyń Londonnan kelgen arnaiy reisin qarsy aldy, dep habarlaidy "Ult aqparat".
SQO ákimdigi ishki saiasat basqarmasynyń málimetinshe, ushaqpen 95 qazaqstandyq keldi. Olar ár túrli jaǵdaiǵa bailanysty shetelde bolǵan elimizdiń 13 qalasynyń turǵyndary.
Reisti mamandar asqan qaýipsizdik sharalaryn saqtai otyryp qarsy aldy. Bekitilgen algoritmge sai barlyq qyzmetterdiń is-qimyly úilestirildi. Sanitarlyq-epidemiologiialyq qaýipsizdik sharalary saqtaldy, iaǵni áýejai aýmaǵy, júk qoiatyn jáne ornalastyrý aimaqtary dezinfektsiialandy.
Ushaq jolaýshylary men ekipaj múshelerin ákimdik jáne politsiia qyzmetkerleri arnaiy baǵyt boiynsha aldyn ala daiyndalǵan meimanhanaǵa jetkizdi. Mamandardyń aitýynsha, kelýshilerge bar jaǵdai jasalǵan.
«Jolaýshylardy jáne ekipaj múshelerin Petropavldaǵy kóp adam qabyldai alatyn úlken meimanhanalardyń birine ornalastyrdyq. Meimanhanada barlyq sanitarlyq-epidemiologiialyq talaptar saqtaldy. Kelgender eki táýlikke oqshaýlandyryldy. Bul jerde olar COVID-19 virýsyna alynǵan zerthanalyq taldaý qorytyndysyn kútedi. Nátijesin alǵannan keiin turǵylyqty jerlerine, úi karantininde otyrý úshin attandyrylady», - delingen baspasóz habarlamasynda.
SQO ákiminiń orynbasary Rýslan Álishev buǵan deiin osy jaǵdaiǵa bailanysty óńir turǵyndarynyń alańdaýyna negiz joqtyǵyn aitqan edi.
