Petropavlda jáne Qyzyljar aýdanynda epidemiologiialyq jaǵdaidyń ýshyǵýyna bailanysty búgin saǵat 00.00-den bastap blokposttar qoiyldy, dep habarlaidy QazAqparat tilshisi.
SQO Sanitariialyq-epidemiologiialyq baqylaý departamenti baspasóz qyzmetiniń málimetinshe, óńirde syrqattanǵandardyń sany kúnnen-kúnge artyp keledi. Tek ótken aptada 42 adam KVI juqtyrǵan. Onyń ishinde 30 jaǵdaida aýrý belgileri bolǵan. Aýyrǵandardyń 19-y Petropavl qalasyna jáne 8-i Qyzyljar aýdanyna tiesili.
Qazir Petropavl qalasynyń mańynda 4 blokpost jáne Qyzyljar aýdany Beskól aýylyna kireberis - «Jezqazǵan-Petropavl» tas jolynyń 935 km bir blokpost jumys istep jatyr.
«Halyq bul blokposttardan PTR testiniń nátijesimen ǵana óte alady. Al qalaǵa nemese Beskólge kelip-ketip jumys isteitinderde qoldarynda anyqtama bolýlary kerek. Sondai-aq azyq-túlik jáne taǵy da basqa birinshi kezektegi taýarlardy tasityndarda osyndai qujat bolýy qajet. Onda aty-jóni jazylady, qai mekemeniń bergeni jáne basshysynyń qoly men móri bolýy kerek. Al jedel-járdem, órt sóndirý sekildi arnaiy qyzmetterdiń kóligi kedergisiz júrip jatyr», - deidi SQO PD Jergilikti politsiia qyzmeti basqarmasynyń bastyǵy Aidyn Baimatov.
Basqarma bastyǵynyń aitýynsha, bir blokbekette 6 politsiia qyzmetkeri kezekshilik etedi. Jalpy bir táýlikte 60 tártip saqshysy osy 5 blokpostqa jumyldyrylatyn bolady.
