Dárigerler Petropavldaǵy tehnikalyq qyzmet kórsetý stansasynda bolǵan jarylystan jaraqattanǵan 9 adamnyń jaǵdaiy týraly aitty, dep habarlaidy QazAqparat.
17 qarasha kúni shahardaǵy kólik jóndeý stansalarynyń birinde jarylys bolyp, arty órtke ulasqan. Aldyn ala boljam boiynsha, stansadaǵy kólikterdiń birinde turǵan gaz qondyrǵysy jarylǵan. Saldarynan 9 adam jaraqat aldy.
Soltústik Qazaqstan oblysy densaýlyq saqtaý basqarmasy baspasóz qyzmetiniń málimetinshe, zardap shekkenderdiń beseýi aýrýhanaǵa jatqyzyldy, úsheýine alǵashqy meditsinalyq kómek kórsetilip, ambýlatoriialyq em alýǵa úiine jiberildi, bireýi aýrýhanaǵa jatýǵa bas tartqan.
«Jaraqattanǵandardyń barlyǵy - er adam. Jastary 50 men 24 aralyǵynda. Tórt adam jaraqat bólimshesine jatqyzyldy. Olardyń beti, eki qoly, iyǵy, endi biriniń aiaǵy men belin kúiik shalǵan. 50 astaǵy er adam jaq-bet hirýrgiiasy bólimshesine ornalastyryldy. 46, 30 jáne 26 jastaǵy úsh syrqat úiine emdelýge jiberildi. Bul adamdarda da jaraqat uqsas, betteri men qoldary kúiip qalǵan. Al 33 jastaǵy er adamnyń beti-qolynan bólek qulaqtaryn da kúiik shalǵan, alaida ol aýrýhanaǵa jatyp emdelýden bas tartty», - dedi baspasóz hatshysy Gúlnar Qalieva.
