Petropavldaǵy mádeniet úiiniń tóbesi opyrylyp tústi, eshkim zardap shekpedi, dep habarlaidy QazAqparat.
Petropavldaǵy mádeniet úii ǵimaraty 1930 jyldary salynyp paidalanýǵa berilgen. Áleýmettik nysan 9 jyl buryn kúrdeli jóndeýden ótken. Endi kóne ǵimarat birtindep buzylyp jatyr. Onyń tóbesin ustap turǵan beton tireýish maiysyp, qulap ketken. Tóbesi qulaǵanda jaqyn mańda qyzmetkerler bolmaǵan, iaǵni zardap shekkender joq. Qazirgi ýaqytta mádeniet úiiniń qyzmetkerleri (ákimshilik quramnan basqasy) qashyqtan jumys isteý rejimine kóshirildi.
«Ústińgi qabattarǵa kóterilýge bolmaidy, tyiym salyndy. Basshylyq ony qatty qadaǵalaýdy tapsyrdy. Tóbesiniń qalǵan bóligi qulap ketý qaýpi bar», - deidi mekemeniń kúzetshisi.
Mádeniet úiinde shyǵarmashylyq ujymdarmen qatar mektep oqýshylaryna arnalǵan 25 úiirme jumys isteidi. Ǵimarattyń apattyq jaǵdaida turǵanyna bailanysty 546 tárbielenýshi basqa ortalyqtarǵa aýystyryldy.
«Tireýi maiysyp ketken. Saraptama jasaldy. Tóbeni qalpyna keltirý úshin jobalyq-smetalyq qujattar ázirlendi. Jónge keltirý úshin oblystyq biýdjetten qarajat suraimyz. Shamamen 105 mln teńge qajet. Mádeniet úii qaitadan qashan iske qosylatyny ázirge belgisiz», - deidi Petropavl qalasy ákiminiń orynbasary Asqar Habibýlin.
