Petropavlda úsh týysyn pyshaqtap, taǵy ekeýiniń ómirine qastandyq jasaǵan 30 jastaǵy er adamǵa sot úkimi shyqty, dep habarlaidy "Ult aqparat".
Soltústik Qazaqstan oblysyndaǵy qylmystyq ister boiynsha mamandandyrylǵan aýdanaralyq sot bir úili jannyń qanyn moinyna júktegen qanisherge úkim shyǵardy. «Óltirý» jáne «Ómirge qastandyq jasaý» baptary boiynsha aiyp taǵylǵan 30 jastaǵy Bekbolat Ǵabdýllin ómir boiyna bas bostandyǵynan aiyryldy.
Qaiǵyly jaǵdai naýryz aiynda Petropavlda boldy. Tergeý málimetterine sáikes, almatylyq Bekbolat Ǵabdýllin naýryzdyń 9-y Nur-Sultan qalasynan Petropavlǵa týystarynyń úiine qonaqqa keledi. Er adam esh jerde jumys istemegen. Qumar oiynǵa salynyp, qaryzǵa belsheden batqan eken.
«Jábirlenýshilerdiń aitýynsha, Ǵabdýllin úi ishin aralap, úidegi qundy zattarǵa qatysty qyzyǵýshylyq bildirgen. Osydan-aq onyń týystaryn tonamaq bolǵany baiqalady. Úi ielerine pyshaqpen umtylǵanda da maǵan aqsha kerek dep aiqailaǵan», - deidi isti qaraǵan sýdia Sergei Viktorenko.
Naýryzdyń 10-y kúni Ǵabdýllin araqqa sylqiia toiyp kelip, saǵat 02.30 shamasynda shabýylyn bastaǵan. Aldymen nemere inisin temeki shegeiik degen syltaýmen shaqyryp alyp, arqasyna birneshe ret pyshaq suqqan. jigit kómekke shaqyrý úshin ekinshi qabatqa ájesiniń bólmesine júgiredi. Ondaǵy telefon arqyly qarama-qarsy turatyn týystaryna telefon soǵyp, esinen tanyp qalady. Ǵabdýllin onyń artynan júgirip kirip, uiqydaǵy qariiany da pyshaqtaidy. Keiin 48 jastaǵy tátesine de pyshaq suǵady.
«Sottalýshynyń jasaǵan qylmysy óte aýyr bolǵandyqtan sot ony qoǵam úshin qaýipti dep tanydy. Sol sebepti Ǵabdýllin ómir boiyna bas bostandyǵynan aiyryldy. Jazasyn qylmystyq-atqarý júiesiniń tótenshe qaýipsizdik mekemesinde óteidi», - deidi Sergei Viktorenko.
Sondai-aq Ǵabdýllinnen jábirlenýshilerdiń paidasyna 14,8 mln teńgeden astam materialdyq jáne moraldyq shyǵyn óndirildi.
