© Photo: "Kyzyljar sý" JShS baspasóz qyzmeti
Petropavl qalasynda taǵy sý qubyry jaryldy. Sonyń saldarynan temirjoldy, jeke menshik úilerdi jáne óndiristik qoimalardy sý basty, dep habarlaidy Sputnik Qazaqstan.
"Qyzyljar sý" JShS atqarýshy direktory Arman Saýtovtyń aitýynsha, qubyr bir táýliktiń ishinde jóndeledi.
"Túngi saǵat birde qaladaǵy sý qysymy túsip ketti degen habar tústi. Brigada birden oqiǵa ornyna attandy. Ońtústik-batys sý taratý jelisinde diametri 800 millimetrlik qubyr tesildi. Sebebi anyqtaldy. Flanets tólkesi julynyp ketken. Buǵan deiin Jumabaev kóshesinde dál sondai aqaý bolǵan", - deidi Saýtov.
Onyń aitýynsha, qazirgi kezde barlyq shaǵyn aýdanda sý bar. Biraq Bereke shaǵyn aýdanynda jáne Jumysshylar kentinde sýdyń qysymy tómen bolyp tur. Osyǵan bailanysty halyqqa sýdy kólikpen jetkizý sharalary uiymdastyryldy.
Apat saldarynan temirjoldy, "Radýga" JShS-ine qarasty qoimalardy jáne 6 ekipáterli úidi sý basty. Oǵan da "Qyzyljar sý" brigadalary jiberildi. Mamandar sýdy sorǵymen aidap shyǵarýǵa kiristi. Jóndeý jumystary bastalyp ketti. Biraq aýa raiy qolaisyz bolyp tur.
"Qubyrdy jóndeý úshin aýa temperatýrasy pliýs bolýy kerek. Sol sebepti qazir apat bolǵan jerdi jaýyp jylytamyz, jylytý quraldaryn qosamyz. Ishinde qolaily temperatýra bolǵasyn sý qubyryn jóndeýge kirisemiz", - dep atap kórsetti kásiporyn basshysy.
Magistralda osymen úshinshi ret qatarynan iri apat bolyp otyr. Buǵan deiin Jumabaev kóshesinde qubyr jarylsa, 316 atqyshtar diviziiasy kóshesinde týra sondai apat boldy.
"Bul qubyr 2009 jyly jańartýdan ótken bolatyn. Birinshi jáne úshinshi apat bolǵan jerde bir merdiger jumys atqardy. Ol - "KEK Rýstem" JShS. Ókinishke qarai, qazir ol firma joq. Sol sebepti eshkimge talap qoia almaimyz. Barlyq shyǵyn "Qyzyljar sýǵa" júktelip otyr", - dedi Saýtov.
Al 1 jeltoqsanda ekinshi apat bolǵan jerdi burynǵy merdiger jóndeidi. 2019 jyly Jumabaev kóshesinde sý qubyrynyń 300 metrin jańartý jumystaryn astanalyq kompaniia - "RemStroiServisPV" JShS atqarǵan. Osy ýchaske 2021 jyly paidalanýǵa berildi. Kepildik eki jylǵa berilgen. Sonyń aiasynda kompaniia apatty jóndep berýge mindetteldi.
