Petropavlda Bereke shaǵynaýdanynda bolǵan órtten 5 adamnyń denesi tabyldy, - dep habarlaidy Tengrinews.kz tilshisi TJM baspasóz qyzmetine silteme jasap.
13 naýryzda saǵat 01:07-de SQO tótenshe jaǵdailar departamentiniń "Órt sóndirý jáne avariialyq-qutqarý jumystary qyzmeti" MM 101 telefonyna Máskeý ótkelindegi 4 páterli turǵyn úiden órt shyqqany týraly habarlama kelip túsken. Oqiǵa ornyna barǵan órt sóndirýishiler №3 páter janyp jatqanyn anyqtaǵan. Úidiń shatyry órtke oranyp, qoiý tútin basqan. Órt shyqqany týraly habarlama quzyrly organdarǵa kesh berilgen.
Órt sóndirýshiler dereý órt sóndirýge kirisken.
"Órt sóndirý barysynda 1975, 1979, 1960 jyldary týǵan úsh er adamnyń jáne 1960, 1967 jyldary týǵan eki áiel adamnyń denesi tabyldy. Qaitys bolǵan adamdardyń deneleri sot-meditsinalyq saraptamaǵa jiberildi. Úi ortalyq jylytý júiesine qosylǵan. Órt saǵat 01.53-te aýyzdyqtalyp, saǵat 02.24-te sóndirildi", - delingen habarlamada.
Órt sóndirý kezinde Petropavl qalasy 4 órt sóndirý bóliminiń 30 órt sóndirýshisi men 6 tehnikasy jumyldyrylǵan. Órt aýmaǵy 60 sharshy metr bolǵan.
Órttiń shyǵýyna ishimdik iship, tósekte temeki tartý sebep bolýy múmkin degen boljam bar. Keltirilgen shyǵyn mólsheri anyqtalyp jatyr. 2022 jyly 1 aqpanda №5 órt sóndirý bóliminiń qyzmetkerleri úilerdi aralaý jumystary barysynda órtten qaitys bolǵan 1960 jyly týǵan er adamǵa órt qaýipsizdik erejeleri jazylǵan jadnama bergeni belgili boldy. Qaza tapqandar halyqtyń áleýmettik osal toptary sanatyna jatpaǵan, ishimdik ishetin adamdar retinde esepte de turmaǵan.
Kýágerlerdiń aitýynsha, órt shyǵar aldynda qaitys bolǵandar spirttik ishimdik ishken.
Biyl SQO aýmaǵynda 115 órt bolǵan. 12 adam qaza taýyp, 4 adam zardap shekken. Al keltirilgen materialdyq shyǵyn shamamen 72 million teńge bolǵan.
