Petropavl qalasynda №42 orta mekteptiń bas býhgalteri Elena Sadovskaia men informatika pániniń muǵalimi Amangeldi Ermekbaev biýdjet qarajatyn jymqyrǵany úshin sottaldy, dep habarlaidy ult.kz. HALYQSTAN Telegram arnasyna silteme jasap.
Tergeý málimetinshe, olar bes jyl ishinde mektep qarjysynan shamamen 90 million teńge shyǵaryp otyrǵan.
Sot materialdaryna sáikes, bas býhgalter mektep direktorlarynyń elektrondy tsifrlyq qoltańbalaryn paidalanǵan. Ol jalaqy, demalys aqysy men syiaqy tóleýge qatysty qujattarǵa qol qoiyp, tólem kólemin óz paidasyna birneshe ese kóbeitip otyrǵan.
Kúdik týdyrmas úshin aqshanyń bir bóligi basqa muǵalimderdiń atyna rásimdelgen. Keiin býhgalter áriptesterinen «kartam buǵattalǵan» dep kómek surap, olardyń bank kartalaryna túsken aqshany qolma-qol sheship berýdi nemese basqa shottarǵa aýdarýdy ótingen.
Muǵalimder oǵan senip, kartalaryn paidalanýǵa bergen. Olardyń esepshottaryna jalaqy nemese avans retinde iri kólemdegi qarajat túsip otyrǵan.
Tergeý nusqasy boiynsha, keiin bul shemaǵa informatika pániniń muǵalimi de tartylǵan. Onyń shottary arqyly da iri kólemdegi aqsha ótken. Ol da áriptesterinen óz shottaryna aqsha qabyldap berýdi suraǵan.
Is materialdarynda jalpy 14 mektep qyzmetkeriniń aty atalady.
Aiyptaý tarabynyń málimetinshe, jymqyrylǵan 90 million teńgeniń shamamen 50 millionyn bas býhgalter alǵan. Al 25 million teńgeden astam qarajat informatika muǵaliminiń esepshottary arqyly ótken.
Zańsyz tólemder tek 2024 jyly júrgizilgen aýditten keiin anyqtalǵan. Tekserý barysynda keibir qyzmetkerler memleketke shamamen 10 million teńgeni óz erkimen qaitarǵan.
Mektep direktorlary býhgalterdiń áreketterinen habarsyz bolǵandaryn aitqan. Osy ýaqyt ishinde mektepte úsh direktor aýysqan.
Nátijesinde sot bas býhgalterge kámeletke tolmaǵan balasynyń bolýyna bailanysty úkimdi bir jylǵa keiinge shegere otyryp, 8 jyl bas bostandyǵynan aiyrý jazasyn taǵaiyndady. Al informatika muǵalimi 7 jylǵa sottaldy.
Úkim ázirge zańdy kúshine engen joq.
