Petropavlda kómekke muqtaj 4875 otbasy Elbasynyń tapsyrmasynan keiin 50 myń teńgeden járdemaqy aldy, dep habarlaidy "Ult aqparat".
«Nur Otan» partiiasy Soltústik Qazaqstan oblystyq filialy baspasóz qyzmetiniń málimetinshe, «Birgemiz» qorynan petropavldyqtarǵa qarjy aýdaryldy. Járdemaqy turmysy nashar, áleýmettik az qamtylǵan otbasylarǵa berildi.
«Elbasy Nursultan Nazarbaevtyń tapsyrmasynan keiin bul jumystar birden qolǵa alyndy. 4875 otbasyǵa 50 myń teńge esepshottaryna tústi. Ol úshin eshqaida barýdyń, aryz jazýdyń qajeti joq. Alýshylardyń tizimin jergilikti bilik organdary ázirledi. Osy tizimge bailanysty tólem jasaldy. Bul joly buryn almaǵan adamdar aldy», - deidi «Nur Otan» SQOF tóraǵasynyń orynbasary Ásem Rahmetova.
Járdemaqyny birinshi bolyp alǵandardyń qatarynda Boris Kýznetsov bar.
«Men úshin kútpegen qýanyshty jaǵdai boldy. Jaqynda ǵana aýrýhanadan shyqtym. Bul aqsha qazirgi ýaqytta maǵan úlken kómek boldy. Osyndai aktsiianyń bolǵany qandai jaqsy», - deidi Petropavl turǵyny.
«Birgemiz» qorynan bir rettik járdemaqy 7 sanatqa jatatyn adamdarǵa beriledi, olar: az qamtylǵan kóp balaly otbasylar, muqtaj múgedekter, asyraýynda múgedek balasy bar otbasylar, tómen zeinetaqy alatyn zeinetkerler, jetim balalar, soǵys ardagerleri jáne tyl eńbekkerleri.
Járdemaqy osymen besinshi ret berildi. Buǵan deiin mundai kómek SQO-da 18 myń 886 adamǵa kórsetilgen.
