Petropavlda 3 jasar qyzyn esinen tanǵansha uryp, miyna zaqym keltirgen 22 jastaǵy kelinshek ýaqytsha ustaý izoliatoryna qamaldy, dep habarlaidy "Ult aqparat".
Soltústik Qazaqstan oblysy politsiia departamenti baspasóz qyzmetiniń málimetinshe, Petropavlda kishkentai qyzynyń densaýlyǵyna aýyr ziian keltirdi degen kúdikpen qala turǵynyna qatysty sotqa deiingi tergep-tekserý bastaldy.
17 qańtar kúni politsiiaǵa oblystyq balalar aýrýhanasyna es-tússiz kúidegi 3 jasar qyzdyń jetkizilgeni jaily habar túsedi.
Miyna zaqym kelgen bala birden jansaqtaý bólimine jatqyzyldy. Sábidi uryp-soqty degen kúdikpen onyń anasy qamaýǵa alyndy.
«Kórineý kámeletke tolmaǵan adamǵa qatysty densaýlyqqa qasaqana aýyr ziian keltirý» baby boiynsha sotqa deiingi tergep-tekserý júrgizilýde.
Qylmystyq is aiasynda qajetti birqatar saraptama taǵaiyndaldy. Kúdikti - 22 jastaǵy kelinshek buryn sottalmaǵan. Ol ýaqytsha ustaý izoliatoryna qamaldy.
«Sotqa deiingi tergeý barysynda kúdiktiler anyqtalyp, olardyń árqaisysynyń is-áreketi baǵalanady. Qylmystyq isti SQO politsiia departamenti men prokýratýra basshylyǵy baqylaýda ustap otyr», - deidi baspasóz qyzmetindegiler.
SQO bilim basqarmasy baspasóz qyzmetiniń málimetinshe, kelinshek qyzyn dúniege ákelisimen qiyn materialdyq jaǵdaiyna bailanysty ýaqytsha sábiler úiine ornalastyrǵan.
«Áiel qyzyna jii kelip turdy. Bes ai ótkesin alyp ketti. Týý týraly kýálik negizinde jáne ata-anasynyń ruqsatymen sábi ákesiniń otbasynda turdy. Al jeltoqsan aiynda ákesi qyzyn anasyna qaitaryp bergen. Balanyń anasyna qatysty sot úkimi shyǵysymen qamqorshylyq jáne qorǵanshylyq organdary áieldi ata-ana quqyǵynan aiyrý máselesin kóteredi» delingen baspasóz habarlamasynda.
