Petropavlda buryn asa aýyr qylmystar úshin sottalǵan er adam 54 jastaǵy áielge shabýyl jasap, oǵan qatysty jynystyq sipattaǵy zorlyq-zombylyq jasaýǵa árekettengen, dep habarlaidy ult.kz.
Oqiǵa kúndiz Jumysshy kentinde bolǵan. Belgisiz er adam áielge shabýyl jasaǵanymen, jábirlenýshi qarsylyq kórsetip, onyń qolynan bosap shyǵyp, kóshede ótip bara jatqan adamdardan kómek suraǵan.
Soltústik Qazaqstan oblystyq politsiia departamentiniń málimetinshe, jedel izdestirý sharalary barysynda kúdikti izin sýytpai ustaldy. Ol – Petropavl qalasynyń 62 jastaǵy turǵyny. Qazirgi ýaqytta ýaqytsha ustaý izoliatoryna qamalǵan.
Politsiianyń habarlaýynsha, qazir oqiǵanyń barlyq mán-jaiyn anyqtaýǵa baǵyttalǵan qajetti tergeý áreketteri júrgizilip jatyr. Tergeý oblystyq politsiia departamenti basshylyǵynyń erekshe baqylaýynda. Tergeý múddesine bailanysty ózge málimet jariialanbaidy.
Belgili bolǵandai, kúdikti buǵan deiin qaraqshylyq, adam óltiremin dep qorqytý arqyly erekshe qatygezdikpen zorlaý jáne kámeletke tolmaǵan balaǵa qatysty seksýaldyq sipattaǵy zorlyq-zombylyq áreketteri siiaqty asa aýyr qylmystary úshin sottalǵan. Soltústik Qazaqstan oblystyq sotynyń 1999 jylǵy 28 jeltoqsandaǵy úkimimen ol 25 jylǵa bas bostandyǵynan aiyrylǵan.
Er adam jazasyn tolyq ótep, 2024 jylǵy 12 qańtarda №51 mekemesinen bosatylǵan. Keiin Aiyrtaý aýdandyq sotynyń 2023 jylǵy 27 qarashadaǵy qaýlysymen oǵan sottylyǵy joiylǵanǵa deiin segiz jyl merzimge ákimshilik qadaǵalaý belgilengen.
Politsiia qylmystyq is boiynsha tergeý jalǵasyp jatqanyn atap ótti. Sondai-aq kúdiktiniń kinási sotta dáleldengenge deiin Qazaqstan Respýblikasynyń zańnamasyna sáikes ol kinásiz dep esepteletinin eskertti.
