Petropavlda karantindik shekteýlerdiń kúsheitilýine bailanysty qala mańynda 5 blokpost qoiylyp, turǵyndardyń kirip-shyǵýy shekteledi, dep habarlaidy "Ult aqparat".
Petropavl qalasynyń ákimi Bolat Jumabekov búgin shuǵyl túrde onlain brifing ótkizip, oblys ortalyǵynyń karantinge jabylýyna bailanysty túsinik berdi.
«Petropavlda epidemiologiialyq ahýal kúrdeli. Naýryz, sáýir, mamyr ailarynda virýs juqtyrǵandardyń sany Petropavlda nebári 26 bolǵan. Ótken táýlikte oblys ortalyǵynda KVI juqtyrǵan 24 adam tirkeldi. Sońǵy bir aptada aýyrǵandar sany 105-ke jetti. Qazirgi ýaqytta infektsiialyq statsionarlar 43% -ke tolyq. Aýrýdyń taralýyn boldyrmaý jáne turǵyndardyń arasynda sanitarlyq qaýipsizdikti qamtamasyz etý maqsatynda birqatar shekteý sharalary qoldanylady», - dedi Bolat Jumabekov.
Petropavl qalasynyń perimetri boiynsha 5 blokpost qoiylady. Olar Mamliýtka qalasy, Beskól aýyly, Býlaev qalasy, Solnechnyi shaǵyn aýdany jáne Shahovskoe eldi mekeni baǵyttary boiynsha ornalasady.
«9 qarashada qala jabylady. Sol sebepti osy ýaqytqa deiin turǵyndar turǵylyqty
jerine shyǵyp nemese oralýlary qajet. Keiin, 5 jasqa deiingi balalardy qospaǵanda, tek PTR test nátijesi arqyly kirip-shyǵýǵa bolady. Qala tirshiligin qamtamasyz etetin uiymdar, azyq-túlik, birinshi qajettilik buiymdaryn tasymaldaýshylar kedergisiz ótedi. Biraq qyzmetkerlerdiń tizimin jergilikti ákimdikke jiberý qajet. Blokposttar apattyq qutqarý qyzmetteri men jedel-járdem avtomobilderi úshin ashyq bolady. Qala ishinde turǵylyqty mekenjaiynan jumys ornyna deiin jáne keri qaitý úshin jumys berýshiden anyqtama bolýy qajet. Qoǵamdyq kólikter tek dúisenbi-juma aralyǵynda saǵat 06.30-dan 22.00-ge deiin jumys isteidi», - dedi Petropavl qalasynyń ákimi.
Bolat Jumabekovtyń aitýynsha, Petropavlda meditsinalyq uiymdar, azyq-túlik emes dúkender men bazarlar, azyq-túlik dúkenderi, qyzmet kórsetý jáne týrizm salasynyń nysandary, sport mekemeleri, qoǵamdyq tamaqtandyrý nysandary, bilim berý mekemeleri, halyqqa qyzmet kórsetý ortalyqtary men Call ortalyqtary jumystaryn jalǵastyrady.
Alaida, olardyń jumys ýaqyty shekteýli bolmaq.
Sondai-aq ol koronavirýske qatysty qalalyq ákimdikte call ortalyqtyń jumys isteitinin eske saldy, oǵan 87152 35 00 17 telefon nómiri arqyly habarlasýǵa bolady.
