Petropavl halyqaralyq áýejaiy qyzmetkerleri birneshe aidan beri eńbekaqysyz otyr. Olardyń alajaǵy 24 mln teńgege jýyq, dep habarlaidy "Ult aqparat".
SQO ákimi baspasóz qyzmetiniń málimetinshe, Petropavl halyqaralyq áýejai qyzmetkerleri onlain túrde ótken óńir basshysy Qumar Aqsaqalovtyń qoǵamdyq qabyldaýyna qatysty.
Mamandardyń aitýynsha, elde karantindik shekteýler engizilgeli olardyń jaǵdailary qiyndaǵan. Qazir kompaniia qyzmetkerlerine eńbekaqy boiynsha 24 mln teńge shamasynda bereshek.
«Eki aidyń ishinde áýejai bankrot dep tanylý úshin arnaiy protsedýrany ótedi. Kompaniia «Soltústik» áleýmettik kásipkerlik korporatsiiasynyń balansyna ótedi. Iaǵni, memleket menshigine alady. Keler jyldyń biýdjetine áýejaidy ustaýǵa qajet qarajatty engizdik. Barlyq shyǵyn jergilikti biýdjet esebinen óteledi», - dedi SQO ákimi Qumar Aqsaqalov.
Nátijesinde burynǵy reisterden bólek, jańa baǵyttar boiynsha da ushaqtar shyǵarylmaq. Mamandardyń jumys orny saqtalyp qalady jáne eńbekaqylary da óspek.
Petropavl halyqaralyq áýejaiy osydan 4 jyl buryn kúrdeli jóndeýden ótti. Qazir Petropavl halyqaralyq áýejaiynan Nur-Sultan, Almaty, Shymkent qalalaryna ǵana reister bar.
