Petropavl qalasyn Jańajyldyq bezendirýge jergilikti biýdjet qarajaty bólinbeidi. Bul týraly búgin Ortalyq komýnikatsiialar qyzmetindegi brifingte Soltústik Qazaqstan oblysynyń ákimi Qumar Aqsaqalov aitty, dep habarlaidy QazAqparat tilshisi.
«Soltústik Qazaqstan oblysynyń biýdjeti, damý biýdjeti tym az. 9 mlrd teńge ǵana. Basqa oblystarmen salystyrǵanda 10 ese kem. Qarajat bolmaǵandyqtan kóp nársege, sonyń ishinde bezendirýge jetpeidi. Sondyqtan byltyr qala ákimshiligine tiisti tapsyrma berip, biýdjetten aqsha bólinbeitindigin eskerttim. Eski zattardy jóndep te paidalanýǵa bolady emes pe?», - dedi oblys basshysy.
Onyń aitýynsha, Jańajyldyq bezendirýge qajetti qarapaiym dúnielerdi balalardyń, kolledj stýdentteriniń kúshimen de jasaýǵa bolady.
«Men qala ákimin ádeii osynda alyp kelip, Astananyń bezendirilýin kórsettim. Qurylǵylardyń eshqandai qiynshylyǵy joq. Ony kolledjerdiń sheberhanalarynda jasaýǵa bolady. Biyl da biýdjetten qarajat bólinbeidi. Byltyrǵy tájiribemizben qalamyzdy bezendiremiz», - dedi Qumar Aqsaqalov.
