Soltústik Qazaqstan oblysynda eki eldi meken karantinge jabyldy. Qazir olardyń qataryna Petropavl qalasyn da qosý máselesi talqylanyp jatyr, dep habarlaidy "Ult aqparat".
SQO Taýarlar men kórsetiletin qyzmetterdiń sapasyn baqylaý departamenti jetekshisiniń orynbasary Tatiana Gorlovanyń aitýynsha, óńirde koronavirýs infektsiiasynyń taralýynyń aldyn alýǵa bailanysty tiisti jumystar atqarylyp jatyr. Alaida halyq áli kúnge deiin bul indettiń qanshalyqty qaýipti ekenin túsinbeidi. Mamandardyń nusqaýlaryn oryndap, qoldan kelgenshe úiden shyqpaý qajettigine mán bermeidi.
«Kúnnen-kúnge indetti juqtyrǵandar sany artyp keledi. Qazir óńirde infektsiiany jinaý kezeńi ótip jatyr dep aitýǵa bolady. Odan keiin aýrýdyń shyńyna jetemiz. Keiin jaǵdai turaqtalady. Bul - álemdik tájiribe kórsetip otyrǵandai, 2-3 aptaǵa sozylýy múmkin. Tek sodan keiin ǵana beti qaita bastaidy. Biz bul infektsiiadan tez qutylǵymyz kelse mamandardy tyńdap, úiden shyqpaýymyz kerek. Sizder bizge úide otyrý arqyly ǵana kómektese alasyzdar. Al eger usynystar oryndalmaǵan jaǵdaida, bul aýrý eń keminde 2-3 aiǵa sozylýy múmkin», - deidi Tatiana Gorlova.
Tatiana Gorlovanyń aitýynsha, qala kóshelerinde áli de beisaýat júrgen adamdardy kezdestirýge bolady. Saýda oryndarynda da eki metr ara qashyqtyqty saqtamaityndar barshylyq.
«Qazirgi bizdiń mindetimiz koronavirýstyń oshaqtaryn anyqtap, onyń ári qarai taralýyna jol bermeý. 65 jastan asqan adamdarǵa úilerińizden shyqpańyzdar deimiz. Deni saý, jas adamdar bul indetti juqtyrǵanymen, olardan aýrýdyń belgileri baiqalmaýy nemese jeńil túrde ótýi múmkin. Biraq ta olar infektsiiany tasýshy retinde basqalarǵa qaýip tóndiredi. Sýyq tiiýdiń belgileri bolǵan jaǵdaida emhanaǵa kelýdiń qajeti joq, birden jedel járdem qyzmetin shaqyryńyzdar», - deidi sanitarlyq dáriger.
Qazir Petropavl qalasynda kúndelikti 183 kóshe jýylyp, dezinfektsiialanyp jatyr. Bul jumystarǵa 10 tehnika bólingen.
«Qajet bolǵan jaǵdaida dezinfektsiia jasaityn kúsh-quraldardy arttyramyz. Bul másele qazir talqylanyp jatyr. Qala kóshelerinen basqa, 400-ge jýyq trotýar, 420 aialdama, gúlzarlar zararsyzdandyrylady. Qalaishilik baǵyttarda júrgen avtobýstardyń sanyn da azaittyq. Biraq sizder úide otyrýǵa tyryspasańyzdar, mamandardyń usynysyn oryndamasańyzdar – bul atqarylyp jatqan jumystardyń bári beker», - deidi Petropavl qalasy ákiminiń orynbasary Vladislav Lýkin.
Búginde arnaiy shtab Petropavl qalasyn karantinge jabý máselesin sheship jatyr.
