Petropavl halyqaralyq áýejaiy satylymǵa shyǵaryldy, dep habarlaidy QazAqparat.
Tender talabyna sáikes Petropavl áýejaiy senimgerlik basqarýǵa 3 jylǵa beriledi. Nysandy alǵan investor 10 jyl boiy áýejai beiinin ózgertpei, tiisti talaptardy oryndap, qaýipsizdikti qamtamasyz etýi qajet. Osy aralyqta kásipker 1,5 mlrd teńge qarjy quiyp, atqarylǵan jumys jaiynda ár jyldyń basynda esep berýi tiis.
Halyqaralyq áýejaidyń múlki 5,6 mlrd teńgege baǵalandy. Aýktsion 31 naýryzǵa josparlanǵan jáne saýda-sattyqqa bir ǵana investor qatyssa da ol ótken bolyp esepteledi.
«Memlekettik menshik nysany básekege qabiletti bolyp, qyzmetterdiń sapasyn damytyp, jaqsartýy úshin investorǵa senimgerlik basqarýǵa berý tiimdi tetikterdiń biri bolyp esepteledi. Áýejai ministrlikter vedomstvosynda bolǵanda memlekettik basqarý tájiribesinen ótti. Alaida, bul mehanizm kásiporyndy damytýǵa, usynylatyn qyzmetterdiń sapasyn arttyrýǵa, tar mamandyqtaǵy qyzmetkerler úshin tiisti jaǵdailardy jasaýǵa múmkindik bermedi. Básekege qabiletti, qarjylai turaqty, damýshy áýejailar jeke kompaniialardyń senimgerlik basqarýyna ótken nemese memlekettik-jekeshelik áriptestikte. Biz taldaý júrgizdik. Ótken jyldyń qarasha-jeltoqsan ailarynda aptasyna 10 ret Nur-Sultan qalasyna, eki ret Túrkistanǵa jáne úsh ret Almatyǵa reister shyǵarý áýejaidyń júktemesin arttyrdy. Alaida, alynǵan tabys tipti jumysshylardyń eńbekaqy qoryn qamtamasyz ete almady. Qazir reisterdi sýbsidiialaý áýejaidyń úzilissiz jumys isteýine múmkindik berip tur. Memlekettik organ áýejaidyń eńbekaqy, kommýnaldyq qyzmetter, qyzmetkerlerdi sertifikattaý jáne oqytý siiaqty aǵymdaǵy shyǵyndaryn qarjylandyra almaidy», - deidi jolaýshylar kóligi jáne avtomobil joldary basqarmasynyń basshysy Maqsat Baiahmet.
Mamannyń aitýynsha, Petropavl halyqaralyq áýejaiynan Nur-Sultan, Almaty, Túrkistan jáne Shymkent qalalaryna sýbsidiialanǵan reister shtattyq rejimde júzege asyrylady.
