Resei prezidenti Pýtinniń baspasóz hatshysy Dmitrii Peskov búgingi brifinginde Kreml 9 mamyrda Máskeýde ótetin paradqa sheteldik liderler shaqyrylmaitynyn aitty, dep habarlaidy Azattyq.
Brifingte RIA Novosti agenttiginiń jýrnalisiniń «Pýtin búgin [Qazaqstan prezidenti] Toqaevpen sóileskende, ony 9 mamyrda Máskeýdegi paradqa shaqyrdy ma?» dep suraǵanda Peskov:
«Jeńis kúnine biz sheteldik liderlerdi shaqyrmaimyz. Bul – dóńgelek data emes. Bul – bizdiń mereke, bul – búkil Resei men reseilikter úshin qasietti mereke. Biraq sheteldik liderlerdi shaqyrmaimyz. Meniń bilýimshe, Lýkashenkony da shaqyrý josparlanbaǵan» dedi.
Kreml 9 mamyrda Máskeýde Jeńis kúnine orai áskeri paradqa daiyndalyp jatyr. Bul áskeri sherý Ýkrainadaǵy soǵys tusynda ótpek. Batys barlaýshylary naýryzda «Kreml 9 mamyrǵa deiin Ýkrainadaǵy soǵysta qandai da bir jetistikke jetýdi josparlaidy» degen edi. Biraq Resei áskerileri Kiev mańynda aitarlyqtai jetistikke jete almai Donbassqa qarai aýysqan. Ulybritaniia qorǵanys ministrligi «Resei áskerileri Donbassta da aitarlyqtai jetistikke jete almai jatyr» deidi.
