Resei prezidenti Vladimir Pýtinniń baspasóz hatshysy Dmitrii Peskov Resei óz aýmaǵynda zymyrandaryn qalaǵan jerine ornalastyratynyn málimdedi, dep habarlaidy Ult.kz tilshisi Azattyqqa silteme jasap.
Peskov bul jaiynda 6 aqpanda Kaliningrad oblysyna jedel-taktikalyq áreket etetin «Iskander» zymyran keshenderin ornalastyrýǵa qatysty kommentariinde aitty. 5 aqpan kúni Litva prezidenti Dalia Gribaýskaite «Kaliningrad oblysyna «Iskander» keshenderi uzaq ýaqytqa ornatylyp jatqanyn» málimdegen.
Litvanyń Rýkla qalasyndaǵy NATO áskeri ornalasqan jerge barǵan Gribaýskaite zymyran keshenderi Litvanyń ǵana emes, «Eýropa elderiniń jartysyna» qaýip tóndiretinin aitqan.
Resei Memlekettik dýmasy qorǵanys komitetiniń tóraǵasy Vladimir Shamanov 5 aqpan kúni reseilik BAQ-qa bergen kommentariinde zymyran keshenderi ornatylyp jatqanyn rastaǵan.
Pentagon buǵan deiin Reseidiń óz aýmaǵyna orta qashyqtyqqa ushatyn ushatyn zymyrandar ornatýyn «1987 jyly jasalǵan Orta jáne qysqa qashyqtyqqa ushatyn zymyrandardy joiý týraly kelisimniń maqsaty men mánin buzady» dep aiyptaǵan. Ol kelisim boiynsha, 500 kilometrden 5500 kilometr qashyqtyqqa deiin ushatyn ballistikalyq jáne qanatty zymyrandarǵa tyiym salynatyn bolǵan.
Amerikalyq áskeri sheneýnikter buǵan deiin Resei zymyrandaryn «NATO elderi men aliansqa qaraityn nysandarǵa qaýip tóndirý úshin ádeii ornatyp jatqanyn» málimdegen.
