Kreml baspasóz hatshysy Dmitrii Peskov Aleksei Navalnyidyń jaǵdaiyna bailanysty is qozǵaýǵa ázirge negiz joq, sebebi ony ázirge nemen ýlandyrǵany belgisiz dep málimdedi. Oppozitsiialyq saiasatkerdi emdep jatqan Berlindegi "Sharite" aýrýhanasy bir kún buryn Navalnyidyń aǵzasynan ýly zattar tabylǵanyn habarlaǵan bolatyn. Aýrýhananyń málimdemesine bailanysty túsinikteme bergen Peskov 25 tamyzda "oǵan qastandyqty Resei biligi uiymdastyrýy múmkin" degen aiyptaýlardy joqqa shyǵaryp, "bos áńgime" dep atady.
"Nemis áriptesterimizdiń qandai málimetke súienip "ýlandy" dep otyrǵanyn túsinbeimin. Bizdiń dárigerler mundai boljamdy áý bastan-aq aitqan, biraq himiialyq zat anyqtalmady" dedi Peskov 25 tamyz kúngi brifing kezinde.
Peskov oppozitsionerdiń komaǵa túsýine yqpal etken zat anyqtalǵan jaǵdaida zertteýge negiz paida bolady dedi. Onyń pikirinshe, nemis dárigerleri Omby dárigerlerinen asyp túsetindei jańa nárse aitpaǵan.
"Barlyq dárigerdiń saraptamasy bir, biraq qorytyndysy ártúrli" dedi ol.
- 24 tamyzda Navalnyidy emdep jatqan Berlindegi “Sharite” aýrýhanasy saiasatkerdiń aǵzasynan ingibitor holinesteraz tobyna jatatyn ýly zattar tabylǵanyn habarlaǵan bolatyn. Bul topqa áskeri maqsatta qoldanylatyn reseilik “Novichok” ýy da kiredi, odan kóp adamdar zardap shekken.
-
Dúisenbi kúni keshke Omby oblysynyń bas toksikology Aleksandr Sabaev Navalnyi aǵzasynan ingibitor holinesteraz tabylmaǵanyn aitqan edi. Onyń sózine qaraǵanda Navalnyidan bul topqa kiretin zattan ýlanǵanyn dáleldeitin klinikalyq belgiler baiqalmaǵan.
-
24 tamyz kúngi málimet boiynsha, Aleksei Navalnyidyń jaǵdaiy aýyr. Saiasatker áli esin jimady. Onyń ómirine qaýip joq, biraq dárigerlerdiń aitýynsha, ý uzaq ýaqyt áser etýi múmkin. Jaqtastary onyń ýlanýyna bailanysty qastandyq jasaý baby boiynsha qylmystyq is qozǵaýdy talap etip otyr.
