Májilis depýtaty Azat Perýashev Astanada bes balanyń ómirin qiǵan joiqyn órt pen oǵan kináliler týraly pikirin bildirdi, dep habarlaidy Sputnik Qazaqstan tilshisi.
Depýtat kináli adamdy izdeý durys ekenin, mundai dúnieni bei-jai qaldyrýǵa bolmaitynyn aitty.
"Astanadaǵy tragediiamen qatar Qyzylordada úsh bala, eki kúnnen keiin Pavlodarda bútindei bir otbasy qaza boldy, sodan keiin Túrkistandaǵy qaiǵyly oqiǵa. Milliardtaǵan biýdjeti bar qyzmetter bolsa da, ókinishke qarai, órt qaýipsizdigi, adamdardyń qaýipsizdigi máselesi bizde ekinshi orynǵa syrǵyp ketip jatyr", - dedi Perýashev.
Perýashev árbir ministr saiasatker retinde óz sózine jaýap berýi kerektigin atap ótti.
"Árbir sheneýnik óz jumysy úshin jaýapkershilikten bas tartpaýy kerek. Ábilqasymova (eńbek jáne halyqty áleýmettik qorǵaý ministri) 16 myń teńge kóp dedi. Menińshe, bul - úlken qatelik. Biraq, bul qateliktiń jýyrdaǵy tragediiaǵa tikelei qatysy joq... Ol úi bul sózden keiin janyp ketken joq, biz osyny túsinýimiz kerek", - dedi májilismen.
Dese de, depýtat Ábilqasymova ministr retinde áleýmettik salaǵa jaýapty ekenin, sondyqtan halyqty mazalaǵan problemalardy úkimet aldyna qoiý qajettigin qadap aitty.
"Ol úkimette otyrǵan oiynshyq emes. Men Ábilqasymova hanymdy qurmetteimin, biraq ministr retinde ol áleýmettik salaǵa jaýapty. Sondyqtan halyqtyń talaby oryndy dep sanaimyn. Ministrdi otstavkaǵa ketirý kerek pe? Jurtshylyq ministrden qandai da bir áreketi úshin jaýapkershilikti talap etýge quqyly. Árbir ministr óz salasyna jaýap berýi tiis", - dedi Perýashev.
Ol eńbek jáne halyqty áleýmettik qorǵaý vitse-ministri Svetlana Jaqypovanyń "ata-analardyń túnde jumys isteýi – olardyń tańdaýy" degenine qatysty da pikirin bildirdi.
"Ata-ana sharasyzdyqtan baryp otyr mundai qadamǵa. Eńbek jáne halyqty áleýmettik qorǵaý ministrligi nege kóp balaly ata-analardy túnde jumys isteýge jiberedi?", - dep ashýlandy depýtat.
Onyń aitýynsha, májilistiń jalpy otyrysynda "Aq jol" fraktsiiasy kóp balaly otbasylarǵa tólenetin áleýmettik járdemaqy, baspana máselesin taǵy da kóteredi.
Perýashev órt qaýipsizdigi máselesi aimaqtyq emes, barlyq óńirde kezdesetin júieli problema ekenin atap ótti.
"Órtke qatysty aitar bolsaq, bul tótenshge jaǵdailar komitetiniń tikelei jaýapkershiligi. Otstavka týraly sóz qozǵasaq, ishki ister ministrliginiń tótenshe jaǵdailar komitetiniń otstavkasy týraly aitýymyz kerek. Bul olardyń tikelei jumysy", - dedi depýtat.
Esterińizge sala keteiik, bir otbasyndaǵy bes balanyń ómirin jalmaǵan órt Astanada Kóktal-1 aýdanynda boldy. Apaly-sińlili bes qyz túnde úide jalǵyz qalǵan, ata-anasy jumysta bolypty. Órt saldarynan 2006, 2009, 2014, 2016 jáne 2018 jyldary týǵan bes bala kóz jumdy.
