Foto: altyn-orda.kz
Astananyń qylmystyq ister jónindegi aýdanaralyq sotynda Perizat Qairatqa qatysty is boiynsha tyńdaýlar jalǵasyp jatyr. 2025 jylǵy 17 shildede sotta kýágerlerdiń biri kásipkerlerdiń oǵan aqshany qolma-qol, eshqandai qujatsyz bergenin málimdedi, dep habarlaidy Ult.kz Zakon.kz-ke silteme jasap.
Kýágerdiń aitýynsha, ol Perizat Qairatpen úsh ret kezdesip, aqsha bergen.
"Barlyq somany dál qaitalai almaimyn, biraq shamamen bir jeke kásipker – 70 million teńge kóleminde berdi. Este saqtaý qabiletim aldamasa, barlyǵy 12-13 jeke kásipker boldy. Men eshqandai jazba júrgizgen joqpyn. Eseptemeler jasalmady. Barlyǵy senim deńgeiinde ótti, sondyqtan muny qujattaýdyń keregi bolmady", - dedi ol.
Onyń aitýynsha, barlyq aqshany Perizat Qairattyń ózi alyp otyrǵan.
"Yńǵaily bolý úshin biz aqshany sómkelerge salatynbyz. Sebebi bankter aqshany oralǵan kúide beretin. Sol úshin olardy sómkelerge salyp berý jeńil bolatyn. Bul sómkeler Perizat Qairattyń ózine qolma-qol berilip, kólikke tieletin. Kádimgi torly, qytai sómkeleri. Somalar aitarlyqtai úlken boldy, mysaly, alǵashqy transhta eki nemese úsh jeke kásipker aqsha bergen bolsa, 70 millionnan eseptesek, shamamen 200 million teńge bolǵan", - dep tolyqtyrdy kýáger.
2025 jylǵy 14 shildede Astanadaǵy aýdanaralyq qylmystyq ister jónindegi sotta Perizat Qairatqa qatysty basty sot protsesi bastaldy. Oǵan alaiaqtyq jáne qylmystyq jolmen alynǵan aqshany zańdastyrý aiyptary taǵylyp otyr.
