Búgin oblys ákimi Amandyq Batalov jasóspirimderge zorlyq kórsetý faktisin anyqtap, kináliniń jazaǵa tartylýyna muryndyq bolǵan, eń bastysy jábir kórgen jasóspirimge der kezinde psihologiialyq kómek kórsetip, jarqyn ómirge bet burǵyzǵan Matai orta mektebiniń psihology Ajar Dúisenbekovany qabyldady, dep habarlaidy "Ult aqparat" Almaty oblysy ákiminiń baspasóz qyzmetine silteme jasap.
Oblys ákimi Ajar Dúisenbekova jaily bloger Janna Ahmetovanyń Facebook paraqshasynan bilgenin aitty. Oqiǵadan beri biraz ýaqyt ótkenimen, bul psihologty kásibiligi úshin marapattaýǵa kedergi emes ekenin de jetkizdi.
«Búgingi kúni árbir pedagog, árbir psiholog osylai jumys isteýi kerek. Balalar sýitsidiniń aldyn alyp, qiyn jaǵdaida olarǵa kásibi maman retinde kómektese bildiń. Qazirgi kezde sýitsid nege ósip ketti? Qiyn jaǵdaiǵa tap bolǵanda jasóspirimder tuiyqqa tirelip, jarqyn ómirge shyǵatyn jol tappai qalady. Ainalasynda adam tolyp júrse de, problemasymen jalǵyz ózi betpe-bet keledi. Sondai kezderde balanyń kóńil kúiin baiqap, áńgimelesip, tyǵyryqtan shyǵatyn jol kórsetý – otbasynda árqaisymyzdyń mindetimiz, al mektepte muǵalimniń jaýapkershiliginde. Sol jaýapkershilikti úlken abyroimen atqardyń. Seniń osy kásibi biliktiligiń barlyq pedagogtarǵa úlgi bolýy kerek», - dep rizashylyǵyn bildirgen oblys ákimi A. Batalov Ajar Dúisenbekovaǵa Qurmet gramotasyn usynyp, noýtbýk syiǵa tartty.
Ajar da óz kezeginde oblys basshysyna alǵysyn bildirdi.
«Meniń ornymda bolsa, kez kelgen psiholog osylai jasaidy dep oilaimyn. Men bir erekshe is jasadym demeimin, tek ózimniń kásibi mindetimdi oryndadym. Árbir bala meiirim men mahabbatqa bólenip ósýi kerek, balaǵa zorlyq jasaýǵa eshkimniń de haqy joq. Sondyqtan biz árbir balanyń taǵdyryna jaýaptymyz. Meni elep-eskerip shaqyrǵanyńyzǵa, marapattap jatqanyńyzǵa shyn júrekten alǵys aitamyn», - dedi A. Dúisenbekova.
Atap ótsek, Ajar Dúisenbekova 11 jyldan beri Matai orta mektebinde psiholog bolyp jumys isteidi. Otbasynda úsh ul tárbielep otyrǵan baqytty ana. 2018 jyly eki birdei jasóspirim qyzdyń taǵdyryna arasha túsip, jábir kórsetýshiniń zańǵa sáikes jazasyn alýyna, al qyzdardyń jańa ómir bastaýyna maman retinde atsalysqan.
