Foto: Pexels.com
Qazaqstanda 8 myńǵa jýyq orta bilim berý uiymynda 400 myńǵa jýyq pedagog jumys isteidi. QR Oqý-aǵartý ministrliginiń málimetinshe, olardyń 300 myńǵa jýyǵy attestatsiia qorytyndysy boiynsha biliktilik sanattary úshin ústemeaqy alady, dep habarlaidy Ult.kz.
2020 jyldan bastap Prezident tapsyrmasyna sáikes, pedagogterdiń ailyq eńbekaqysy 100%-ǵa ósti. Sondai-aq 2023 jyldyń qyrkýieginen bastap mektepke deiingi bilim berý uiymdarynyń tárbieshileriniń jalaqysy 30%-ǵa artty. Al tehnikalyq jáne kásiptik bilim berý uiymdaryna kásiporyndardan tartylǵan mamandarǵa 30-35 % kóleminde ústemeaqy qosyldy.
«Pedagog mártebesi týraly» zań qabyldanǵannan keiin, muǵalimderdiń jalaqysynyń mólsheri biliminiń, sanatynyń (sheber, zertteýshi, sarapshy, moderator) deńgeiine jáne eńbek ótiline, júkteme kólemine, sondai-aq eńbek etý jaǵdaiyna bailanysty qosymsha tólemder, akademiialyq dárejesiniń bolýy (10 AEK), tálimgerlik etýi, sabaqtan tys sporttyq dárister berýine (bazalyq laýazymdy eńbekaqydan 100%) bailanysty qalyptasady.
Osylaisha, túrli sanattarynyń bolýyna bailanysty pedagogterge kelesidei ústemeaqy tólenedi:
- • Pedagog-sheber – 50%;
- • Pedagog-zertteýshi – 40%;
- • Pedagog-sarapshy – 35%;
- • Pedagog-moderator – 30%.
Aýyl muǵalimderine erekshe kóńil bólinýde – olardyń jalaqysy qalalyq áriptesterine qaraǵanda, keminde 25%-ǵa joǵary.
2024 jyldyń qorytyndysy boiynsha Qazaqstanda muǵalimniń ortasha ailyq jalaqysy 1 mólsherleme úshin (16 saǵat) 352 myń teńge, al aýyl muǵalimderi úshin 435 myń teńgeni qurady. Bul rette Ulttyq bilim berý derekter bazasynyń málimetinshe, elimizdiń pedagogteriniń jartysy 1,5 mólsherlememen (24 saǵat) jumys jasap, aiyna ortasha 581 myń teńge jalaqy alady.
Sonymen qatar, Qazaqstan bilim berý isindegi jetistikteri, olimpiada júldegerlerin daiyndaǵany jáne memlekettik nagradaǵa ie bolǵany úshin aqshalai syiaqymen marapattaýdy úrdiske ainaldyrǵan sanaýly elderdiń biri. 2023 jyly 89 pedagog memlekettik syiaqynyń laýreaty atandy, syiaqy kólemi 3,6 mln teńgeni (1000 AEK) qurady. Marapattalýshylardyń arasynda – Eńbek erleri, Qazaqstannyń eńbek sińirgen ustazdary, «Úzdik pedagog» baiqaýynyń jeńimpazdary bar.
Osylaisha, sońǵy bes jylda Qazaqstan ailyq jalaqynyń ósýin ǵana emes, ústemeaqy tóleý jáne yntalandyrý júiesin qamtamasyz etý arqyly pedagogterdiń mártebesi men qarjylyq áleýetin kóterý baǵytynda mańyzdy bastamalardy júzege asyrdy.
