21 mamyrda pedagogtardan Ulttyq biliktilik testin tapsyrýǵa ótinim qabyldaý bastalady. Bul týraly QR Bilim jáne ǵylym ministrliginiń Mektepke deiingi jáne orta bilim komitetiniń tóraiymy Maira Meldebekova aitty, dep habarlaidy "Ult aqparat".
«Elimizdegi karantin jaǵdaiyn eskere otyryp ulttyq biliktilik testin 3 ai ótkizýdi josparlap otyrmyz. Bul - maýsym, shilde, tamyz ailary. Qujat qabyldaý 21 mamyrdan bastalady. Jalpy, erejede tapsyrý ýaqyty da uzartyldy. Matematika, himiia, fizika, informatika pánderiniń pedagogtaryna 240 minýt beriledi», - dedi Maira Meldebekova ministrliktiń Facebook paraqshasynda onlain rejimde ótken apparat jinalysynda.
Onyń atap ótýinshe, ministrlik oblystyq bilim basqarmalarynan biyl ulttyq biliktilik testin tapsyrýy múmkin pedagogtardyń boljamdy sanyn alǵan.
«Joǵary oqý oryndarynyń túlekterin qospaǵanda shamamen 113 myń pedagog test tapsyrady. Test tapsyrmalarynyń bazasy bar. Onda shamamen 135 myńǵa jýyq tapsyrma qamtylǵan. Biyl taǵy 21 myń jańa tapsyrma ázirlendi. Tolyqtai alǵanda, búgingi kúni baza jumys istep tur. Ony synaqtan ótkizip kórdik», - dedi komitet tóraiymy.
Maira Meldebekovanyń aitýynsha, pedagog ózine qolaily ýaqytta bazaǵa tirkele alady.
