Paidalanylmaityn aýyl sharýashylyǵy jerlerin qaitarý merzimi 2-den 1 jylǵa qysqartylmaq. Bul týraly búgin Úkimet otyrysynda Aýyl sharýashylyǵy ministri Saparhan Omarov aitty, dep habarlaidy QazAqparat.
Onyń aitýynsha, 2019 jyldyń sońynda ǵaryshtyq monitoringti qoldanýdyń zańnamalyq bazasy qalyptastyryldy. 2020 jyldyń basynda paidalanylmaityn aýyl sharýashylyǵy jerlerin anyqtaý boiynsha pilottyq joba elimizdiń 4 oblysynda - Aqmola, Shyǵys Qazaqstan, Qostanai jáne Mańǵystaý oblystarynda iske qosyldy. Nátijesinde paidalanylmai jatqan 8,3 mln gektar jer anyqtaldy, onyń - 7,6 mln gektary jaiylym.
«Atalǵan oblystardyń ákimdikteri paidalanylmaityn jerlerdi memleket menshigine qaitarýdy jedeldetip, olardy aýyl sharýashylyǵy ainalymyna tartýdy qamtamasyz etýi qajet. Osy jyldyń qańtarynan bastap ǵaryshtyq monitoring respýblikanyń barlyq aýmaǵynda qoldanylýda. Paidalanylmaityn aýyl sharýashylyǵy jerlerin qaitarý merzimderin 2 jyldan 1 jylǵa deiin qysqartý, olardy ǵaryshtyq monitoring derekteri negizinde sot tártibimen qaitarý, habarlamany qaǵaz júzinde emes elektrondyq SMS-habarlama arqyly tapsyrýǵa kóshirý boiynsha zań jobasy ázirlendi. Ol qazirgi ýaqytta Úkimetpen pysyqtalýda. Búginde Jerdi memleket menshigine qaitarý tetikteri bar. Memleket basshysynyń tapsyrmasyn oryndaý úshin jergilikti atqarýshy organdar olardy barynsha paidalaný sharalaryn qabyldaýy qajet», - dedi ministr.
