Marapatqa, jalǵan ataqqa qumarlyqqa elimizde asqynyp turǵan indet te tosqaýyl bola almaǵany ókinishti! Tipti Pavlodar oblysy ákimdigi aqparat jáne qoǵamdyq damý basqarmasynyń basshysy Baýyrjan Qapenov indet kúiip turǵan kezeńdi aqyryn ǵana qara basynyń paidasyna jaratyp úlgergenin aitsańyzshy!
Qapenov basqaratyn basqarma 28 maýsym – Bailanys jáne aqparat qyzmetkerleri kúni qarsańynda buqaralyq aqparat quraldary ókilderin tiisti marapattarǵa usyný mindetin arqalaityny belgili. Alaida basqarma basshysynyń oryntaǵyna qonjiǵanyna az ǵana ýaqyt ótse de, Qapenov joǵarǵy jaqtyń salmaqty nagradasyna ózgeni usynyp sharshamai-aq, ózine ala salypty. Ony uialmai-qyzarmai feisbýk paraqshasynda jariia etti. Jaǵympazdardyń bir toby men onyń «qamqorlyǵyn» kórip júrgender, árine, shýyldasyp quttyqtai ketti.
Qapenovtiń eńbek jolyna úńilsek, 1985-1995 jyldary pedagogikalyq salada eńbek etken. 1995 -1999 jyldary áleýmettik saiasat bóliminiń bas mamany, ishki saiasat bólimi jáne áleýmettik-mádeni sala meńgerýshisi, Pavlodar qalasy ákiminiń aqparat jáne qoǵamdyq kelisim bóliminiń meńgerýshisi bolypty. 1999-2009 jyldary ishki saiasat basqarmasyn, Pavlodar qalasy ishki saiasat bólimin basqarǵan, sondai-aq, Pavlodar qalasy ákiminiń orynbasary qyzmetin atqarǵan.
2009-2011 jyldary «Pavlodarteleradio» kásipornyna basshylyq etip, 2011-2015 jyldary oblystyq ishki saiasat basqarmasyna, 2015-2017 jyldary Pavlodar oblysy ákimi apparatynyń uiymdastyrý-inspektorlyq bólimine jetekshilik etedi.
Keiingi jumys orny – Pavlodar oblysy ákimi apparaty basshysynyń orynbasary.
Osylaisha ár qyzmettiń basyn bir shalǵan Qapenovtiń ómirbaiany onyń aqparat salasyna qatysynyń azdyǵyn, iaǵni, salada tiip-qashyp arakidik bir-eki jyldan ǵana eki ret jumys istegenin aiǵaqtap tur.
Qapenovpen birge «Aqparat salasynyń úzdigi» tósbelgisimen elimizdiń ózge aimaqtarynan marapattalǵandar tizimine úńilseńiz, bári de buqaralyq aqparat quraldary salasynyń otymen kirip, kúlimen shyǵyp júrgender. Qarańyz: Dostan Eldesov - «Qazaq úni» gazetiniń orys redaktsiasynyń redaktory; Ǵalym Jailybai - «Qazaqstan jazýshylar odaǵy» RQB «Juldyz» jýrnalynyń bas redaktory; Ýnerbek Janabaev - «Qazaqstan» UTA aqparattyq-saraptamalyq baǵdarlamalar direktsiiasynyń aqparattyq jobalar bóliminiń tilshiler jelisiniń teleoperatory; Erkin Jappasuly -
«Qazaqstan jazýshylar odaǵy» RQB «Qazaq ádebieti» gazeti redaktsiiasynyń meńgerýshisi. Tizim osylai jalǵasyp kete beredi. Tizimdegi kópshilik – oqyrman men kórermenge maqalalary men siýjetteri arqyly asa tanys tulǵalar. Birqatary - maqalasymen tanylmasa da, kúndelikti qyzmetinde saýatty baspasóz habarlamasyn jazyp, BAQ-tyń shynaiy aqparatpen tolyǵýyna úlesin qosqandar. Arasynda Qapenov siiaqty bir aqpar jazbastan, óziniń qyzmettik laýazymyn paidalanyp medal alǵandar joqtyń qasy.
Pavlodar óńirinde osy marapatqa laiyqty talai maitalman jýrnalist bar edi. Biraq Qapenov olardyń bireýin de kózge ilmei, óziniń qara basyn áspettep álek. Pavlodarlyqtar bul joly qalam ustaǵan júirikterdiń tiziminde japadan-jalǵyz japalaq qusap jarbiyp turǵan Qapenov úshin qatty uialyp otyr.
Osy tusta oqyrman qaýymnyń esine Qapenovte medaldan jabysqan «dert» burynnan baryn eskerte ketpei jáne bolmaidy. Ol týraly belgili aqyn, halyqaralyq «Alash» ádebi syilyǵynyń iegeri Arman Qani jazyp-jazyp sharshady. Arman aǵamyzdyń sózinen úzindi keltireiik:
«1989 jyly Oljas Súleimenov «Nevada-Semei» antiiadrolyq qozǵalysyn qurǵanda Pavlodar oblystyq partiia komitetiniń I hatshysy Iu.A. Mesheriakov Semei poligonynyń Pavlodar oblysyna qandai da bir ziiandyǵy joq degen kózqarasty ustandy. Ol kezde Mereke Abylqasymov Mai aýdany Chapaev keńshary (qazirgi Saty aýyly) partiia uiymynyń hatshysy bolyp isteitin. Óziniń osyndai partiialyq qyzmetine ári I hatshynyń álgindei ustanymyna qaramastan aýdan ortalyǵy Belogorede (qazirgi Kóktóbe) alǵashqy antiiadrolyq mitingti uiymdastyrdy! Sóitip, obkommen teketireste amal tappai ańdysyp turǵan qoǵam belsendilerine jol ashyp berdi! Nátijesinde Mai, Lebiaji, Baianaýyl aýdandary Semei iadrolyq synaq poligonynan zardap shegýshi aýdandar sanatyna endi de, on myńdaǵan adam túrli jeńildikterge, ótemaqyǵa ie boldy!
Bul - Mereke Abylqasymovtyń jáne syndarly kezeńde sonyń janynan tabylǵan azamattardyń erlikke jeteǵabyl eńbegi ekenin biz, «Nevada-Semei» qozǵalysynyń ardagerleri jaqsy bilemiz!
Tek, eń ókinishtisi, «Nevada-Semei» qozǵalysyna - 25 jyl» medali olardyń eshqaisysyna tigen joq. Osynaý marapatty qozǵalysqa esh qatysy joq Pavlodar oblysy ishki saiasat basqarmasynyń basshysy Baýyrjan Kapenov jáne onymen jaqsy qarym-qatynastaǵy Iýrii Pavlenko siiaqtylar ielenip ketti»...
Iá, Ertistiń Kereký óńirinde «Nevada-Semei» qozǵalysyna Baýyrjan Qapenov degen azamattyń eńbegi sińipti degendi estigen jan joq. Eńbegi sińbese de ol «Nevada-Semei» qozǵalysyna - 25 jyl» medalin keýdesine uialmai taǵyp aldy. Qyzmetine bailanysty poligon taqyrybyndaǵy konferentsiia nemese seminar birdeńe uiymdastyrsa, ózi biledi. Biraq bir medaldiń quny bir konferentsiia emes qoi.
Osy jaitty azýly aqyn Arman Qani Qapenovke de, ákim-qaralarǵa da talai aitqanymen, tyńdar qulaq bolmady. Bolmaǵanynyń belgisi – Qapenovtiń taǵy bir tósbelgini taǵyp alýy. Osylaisha, toǵyshar basshy tósbelgige óziniń naǵyz iesin tabýǵa kedergi bolyp, obal qyldy...
Nurǵali Baitaq, Pavlodar oblysy
