Eńbek naryǵyn teńestirý baǵytynda qolǵa alynǵan memlekettik joba boiynsha Ońtústik Qazaqstan oblysynyń Maqtaral aýdanyna pavlodarlyq delegatsiia keldi.
Lebiaji, Jelezin aýdandarynyń basshylary men jumyspen qamtý, áleýmettik baǵdarlamalar bólimderiniń ókilderi myrzashóldikterge jobanyń tiimdi tustaryn aitty. Soltústik oblystarda belsendi eńbek etýge shaqyrdy, dep habarlaidy Ult.kz tilshisi.
Bos jumys oryndary Sharbaqty aýdandyq ortalyq aýrýhanasy men bilim uialarynan da usynyldy. Jalpy, jiyn oqý ornyn bitirip, jumys taba almai qinalǵan jastar men jas otbasylarǵa tiimdi boldy. Pavlodarlyq delegatsiia ondaǵy mektepterde tipti, oqýshy da tapshy ekenin jasyrmady. Máselen, 11-shi synypty bitirgen túlekterdiń ózi Resei asyp, sol jaqtyń joǵary oqý oryndaryna túsip jatyr. Qaityp kelýge de qulyq tanytpaidy eken. Sondyqtan soltústik oblysta igeretin is te, jer de jetedi. Baspana da qymbat emes. 200-800 myń teńgeniń aralyǵynda, - dedi bólim basshylary.
«Biz munda jas mamandardy shaqyrýǵa keldik. Óitkeni, bizde aǵylshyn tili muǵalimi, matematika, qazaq tili, tarih pánderiniń muǵalimderi men tárbieshiler jetkiliksiz. Sondyqtan, bizdiń aýdanda kelgen kisilerdi qýana kútemiz. Ár muǵalimge úi beriledi. Ol oryndarǵa januiamen kele me? Sol januialaryna ár kisiniń ózine kómek kórsetiledi. Ol kisilerdi aparǵannan keiin túgel jaǵdailaryn jasaimyz», - dedi Aqtoǵai aýdandyq bilim bóliminiń bas mamany Saltanat Syzdyqova.
Jalpy, eńbek naryyyǵyn teńestirip, soltústik oblys halqyn 5 millionǵa jetkizý - aldaǵy 20 jyldyń mejesi. Bul baǵytta memleketten qoldaý kóp. Jol shyǵyny, jatyn oryn - bári qarastyrylǵan. Sol maqsatta soltústik oblysynyń delegatsiia músheleri aýdan, aýyldardy aralap, jas mamandardy jumysqa shaqyrýda.
