9 qarashadan bastap Pavlodar oblysynda shekteý sharalary qabyldanady, dep habarlady Úkimet basshysynyń baspasóz qyzmeti.
COVID-19-dyń taralýyna jol bermeý máseleleri jónindegi vedomstvoaralyq komissiianyń tóraǵasy, Premer-ministrdiń orynbasary Eraly Toǵjanov Pavlodar oblysyna jumys sapary barysynda óńirdegi meditsina nysandarynyń koronavirýstyń bolýy múmkin kelesi tolqynyna daiyndyǵyn tekserdi.
Sondai-aq vitse-premer óńirdegi epidemiologiialyq jaǵdai boiynsha keńes ótkizdi, jergilikti memlekettik organdar men politsiia departamenti basshylyǵynyń qabyldanyp jatqan sharalar týraly esebin tyńdady.
Premer-ministrdiń orynbasary aýyldyq jerlerde PTR zerthanasynyń joqtyǵyn eskere otyryp, bul qyzmet túriniń oblys turǵyndaryna qoljetimdi bolýyn tez arada sheshýdi tapsyrdy.
Eraly Toǵjanov qazan aiynyń qorytyndysy boiynsha óńirde tirkelgen SOVID-19 faktileriniń úsh esege óskenin atap ótti.
Vedomstvoaralyq komissiianyń tóraǵasy óńirdegi epidemiologiialyq jaǵdaidy turaqtandyrý úshin oblys ákimdigine 2020 jyldyń 9 qarashasynan bastap birqatar shekteý sharalaryn qabyldaýdy tapsyrdy:
- Pavlodar qalasynyń perimetri boiynsha blok beketter ornatylady;
- kún saiynǵy ósim 10-nan astam jaǵdaida eldi mekenderde sanitarlyq blok beketter ornatylady;
- myna baǵyttar boiynsha áýe qatynasy qysqartylady: Pavlodar-Almaty aptasyna 10 reisten 5 reiske deiin; Pavlodar-Nur-Sultan 3 reisten 1 reiske deiin; Pavlodar-Shymkent aptasyna 2 reisten 1 reiske deiin;
- Pavlodar-Almaty baǵyty boiynsha temirjol tasymaldary aptasyna 7 retten 3 retke deiin qysqartylady;
- jolaýshylar temirjol quramalarynyń oblys ishinde aialdaýyna (oblys ákimdigi belgilegen jerlerdi qospaǵanda) tyiym salynady;
- dini obektilerdiń, teatrlardyń, kinoteatrlardyń, mádeniet obektileriniń qyzmeti ýaqytsha toqtatylady;
- qoǵamdyq tamaqtaný obektileriniń jumysy saǵat 20:00-ge deiin shekteledi;
- oflain rejimde keńester ótkizýge tyiym salynady;
- qyzmetkerlerdiń keminde 80%-i qashyqtan jumys isteý rejimine kóshiriledi;
- 65 jastan asqan adamdarǵa azyq-túlikti, birinshi kezekte qajetti taýarlardy, dári-dármekterdi jáne meditsinalyq buiymdardy satyp alý jaǵdailaryn qospaǵanda, asa qajettilik bolmasa turǵylyqty jerinen shyqpaýǵa keńes beriledi.
Demalys jáne mereke kúnderi:
- qoǵamdyq kóliktiń (tramvailar, avtobýstar, marshrýttyq taksiler) jumysy toqtatylady;
- jabyq jáne ashyq azyq-túliktik emes jáne azyq-túlik bazarlarynyń jumysy toqtatylady;
- monshalardyń, saýnalardyń jumysy toqtatylady;
- qoǵamdyq tamaqtaný obektileriniń jumysy tek tapsyrys berýshige jetkizý formatyna kóshiriledi.
Sońǵy málimet boiynsha, Pavlodar oblysynda 4 382 adam koronavirýs juqtyrǵan, sońǵy táýlikte 41 naýqas anyqtaldy.
