Pavlodarda kópqabatty úiden qulaǵan muz keseginen basynan aýyr jaraqat alǵan 25 jastaǵy áielge qatysty oqiǵanyń mán-jaiy anyqtaldy, dep habarlaidy ult.kz.
Politsiianyń málimetinshe, bul qasaqana jasalǵan áreket emes. Oqiǵaǵa 12 jastaǵy qyz bala abaisyzda sebep bolǵan.
Pavlodar oblysy politsiia departamentiniń habarlaýynsha, jasóspirim balkonda turǵan kezde muzdy syndyrýǵa áreket jasaǵan. Sol sátte muz kesegi qolynan syrǵyp ketip, tómende ótip bara jatqan áieldiń ústine qulaǵan.
«Kámeletke tolmaǵan qyzdyń aitýynsha, ol balkonda turǵan muzdy syndyrmaq bolǵan. Alaida muz kesegi baiqaýsyzda qolynan túsip ketip, tómendegi áielge tigen», – dep habarlady politsiianyń baspasóz qyzmeti.
Oqiǵadan keiin qyz qorqyp, bolǵan jaǵdaidy ata-anasyna da, basqa eresekterge de aitpaǵan.
Politsiia balanyń zańdy ókilderin ata-analyq mindetterin tiisinshe oryndamaǵany úshin ákimshilik jaýapkershilikke tartty.
Qazirgi ýaqytta oqiǵanyń barlyq mán-jaiy anyqtaldy.
