Bilim jáne ǵylym ministri Ashat Aimaǵambetov Pavlodarda órtengen mektep týraly pikir bildirdi, dep habarlaidy QazAqparat.
«Munyń birinshi jaǵdai emestigin aitý kerek. Sondyqtan biz barlyq oqytý uiymdaryna tolyq tekserý júrgizýdi tapsyrdyq. Sebebi órtke qarsy sharalar saqtalýy tiis. Mektep paidalanýǵa berilgende, jóndeýden keiin jáne jańa oqý jyly bastalar aldynda mindetti túrde aktiler bolýy kerek. Onyń ishinde órtke qarsy qyzmetterden de bolýy qajet. Sondyqtan, meniń oiymsha, mundai anyqtamalar men aktiler boldy, endi órttiń neden týyndaǵanyn bilý úshin tergeý júrgiziletin bolady. Mende bar aqparatqa sáikes, kúiik alǵandar men zardap shekkender joq. Tek bir muǵalim osy jaǵdaiǵa bailanysty psihologiialyq problemaǵa ushyrady. Oǵan psihologiialyq kómek kórsetilip jatyr», - dedi Ashat Aimaǵambetov Senatta tilshilerge bergen suhbatynda.
Sonymen birge, Bilim ministri oqýshylardyń sabaqty qalai jalǵastyratynyn aityp berdi.
«Qazir ǵimarattyń ózine tolyq tekserý júrgiziledi. Tiisti qyzmetter órttiń sebebin anyqtaidy. Eger ári qarai oqýǵa esh qaýip bolmasa, balalar oqýyn jalǵastyra alady. Ázirge olar ýaqytsha qashyqtan oqi alady. Al ǵimarattyń jaramsyz ekeni anyqtalsa, ákimdik bul balalardyń oqýyn basqa uiymdarda jalǵastyrý sharalaryn qarastyrady», - dedi ol.
