Foto ashyq derekkózden
Pavlodardaǵy 10 myńnan astam adam turatyn Lenin kentiniń ataýy ózgerdi. Kent turǵyndary Atameken degen ataýdy tańdaǵan, - dep habarlaidy "Ult aqparat" pavlodarnews.kz saityna silteme jasap.
Pavlodarǵa qarasty Lenin kentiniń mádeniet úiinde kent ataýyn ózgertý boiynsha qoǵamdyq tyńdaý ótti. Kent ákimi Marjan Alshymbaevanyń aitýynsha, toqsan saiyn turǵyndarmen kezdesý ótip turady. Sol kezdesýlerde kenttiń ataýyn ózgertý týraly ótinish jii túsip turǵan.
Biyl birqatar turǵynnan qala ákimi men oblys ákimine kenttiń ataýyn ózgertý týraly ótinish túsken. Sodan keiin 1 ai buryn oblystyq gazetterde 29 sáýirde qoǵamdyq tyńdaý ótetini týraly habarlama taratylǵan.
"Oǵan deiin jergilikti turǵyndarmen jiyndar ótti. Aqparattandyrdyq. Toptar quryldy. Kóp usynys tústi. 20-ǵa jýyq ataý usynyldy. Degenmen jergilikti turǵyndarmen ótken jiyndarda 7 usynys irikteldi. Oǵan Qazanǵap, Bidaiyq, Atameken, Yntymaq, Qazyna, Jetinshi aýyl ataýlary jáne ataýdy ózgertpeý nusqasy kirdi. Odan keiin búgingi qorytyndy jiynda eki ataý: Qazanǵap bi jáne Atamekendi qarastyrý týraly sheshim qabyldandy", - dedi Marjan Alshymbaeva.
Qoǵamdyq tyńdaýǵa kent turǵyndary, jergilikti qoǵamdastyq músheleri, jaqyn aýyldardaǵy jáne qaladaǵy aýyldyń týmalary, aýylǵa qatysy joq adamdar da keldi. Jinalǵandardyń pikiri tyńdaldy. Alaida sheshimdi jergilikti qoǵamdastyq músheleri shyǵardy.
Daýys berýge jergilikti qoǵamdastyqtyń 50 múshesi qatysyp, 49 adam Atameken ataýyna daýys berdi. Endi zańnama boiynsha ataýdy ózgertý jumysyna 3-6 ai ýaqyt jumsalady.
Qoǵamdyq tyńdaýda sóz sóilegen kent turǵyny Zańǵar Erbol iri tulǵalardyń atymen mekemelerdi ataǵan jón ekenin aitty.
"Men osy mańdaǵy Jolqudyq aýylynda turǵanmyn. Sol aýyldyń meshitiniń ataýy Qazanǵap bidiń atynda. Qadirli tulǵalarymyzdyń aty sondai qasietti jerlerge, mekemelerge berilse dep oilaimyn. Óitkeni uly kisilerdi ulyqtaý kerek. Al aýyldyń atyn bireý maqtaidy, bireý dattaidy, bireý boqtaidy. Atańdy boqtatqansha, atyn mádeni oshaqtarǵa bergen jón. Sondyqtan Atameken ataýyn qoldaimyn", - dedi Zańǵar Erbol.
Al Qaiyrbek Muhamediiarov - osy kenttiń týmasy. Qazir de osy jerde turyp jatyr. Ol da jiynda Atameken ataýyn qoldaitynyn aitty.
"Árkim óz atasyn maqtaidy. Sonda biz qaida baramyz. Qazanǵap atamyzdy túsinip otyrmyz. Úlken tulǵa bolǵan. Biraq eldi biriktirý úshin Atameken atalýy kerek. Men osynda týyp, osynda turyp jatyrmyn. Meniń kórshim Dima aýylda 1 jyl ǵana turady. Biraq ekeýimizdiń quqyǵymyz birdei. Bizdiń balalarymyz, nemerelerimiz birge oinaidy. Biraz ýaqyt ótedi, onyń balalary mine meniń atamekenim deitin bolady. Sondyqtan Atameken ataýy bolýǵa tiis", - dedi Qaiyrbek Muhamediiarov.
Aita keteiik, Lenin kentinde 10 myńnan astam adam, onyń ishinde 20-dan astam ult jáne ulys ókili turady.
