«Daimler Benz» kóliginiń 23 jastaǵy júrgizýshisine qatysty eki bap boiynsha is qozǵaldy. Oǵan aiyppul salynyp, kóligi aiyp turaǵyna qoiyldy, dep habarlaidy "Ult aqparat".
«26 naýryz kúni saǵat 15.00-de Pavlodar qalasynda júrgizýshi kóligimen Lomov kóshesindegi 154/4 úidiń aýlasynda júrip kele jatyp, onda kámelet jasyna jetpegen jaiaý júrginshini qaǵyp ketken. Júrgizýshi oqiǵa ornynan izin sýytty», - dep baiandady Pavlodar oblystyq politsiia departamenti jergilikti politsiia qyzmeti bastyǵynyń orynbasary Qýanysh Mustafinov.
Onyń aitýynsha, jaiaý júrginshi aýrýhanaǵa meditsinalyq kómek surap kelgen.
Onyń densaýlyǵyna kelgen ziian aýyrlyǵynyń deńgeiin anyqtaý úshin sot-meditsinalyq saraptama taǵaiyndaldy.
Aimaqtyq PD baspasóz qyzmetinen politsiia qyzmetkerleriniń jaqyn mańdaǵy úiler men kireberisterde ornatylǵan beinetaspa jazbalaryn qarap shyqqanyn, oqiǵa ornynan ketip qalǵan júrgizýshini tabý úshin izdeý sharalaryn ótkizgenin qosyp ótti.
«28 naýryzda politsiia júrgizýshi men «Daimler Benz» kóligin anyqtady. 23 jastaǵy júrgizýshige qatysty QR Ákimshilik quqyq buzý kodeksiniń 610, 611 baptary boiynsha ákimshilik is qozǵaldy, aiyppul salyndy. Kólik aiyp turaǵyna qoiyldy», - dedi Qýanysh Mustafinov.
