Pavlodarda sot jasóspirim qyzǵa shabýyl jasaǵan áiel men er adamdy jazalady. Oqiǵa aialdamada bolǵan, - dep habarlaidy Tengrinews.kz saity.
Zardap shekken oqýshy qyzdyń anasynyń aitýynsha, onyń qyzy men qurbysy avtobýs kútip turǵan.
"Qyzym aiaǵyn oryndyqqa qoiyp, telefonmen sóilesip otyrǵan. Er adam men áiel oǵan eskertý jasaǵan. Qyzdar jaýap berip, tipti turyp, ózimiz súrtemiz dep aitqan. Biraq er adam munymen tynyshtanbaǵan, qyzymdy shashynyń túsine bola balaǵattap, birdeńe qoldanatynyn aityp, ony nashaqor dep jamandaǵan. Qyzym jaýap retinde dóreki sóilegen, sodan keiin áiel onyń shashynan ustap, aialdamanyń artyna súirep aparyp, urǵan", - dedi qyzdyń anasy.
Áieldiń aitýynsha, qyzy oǵan telefon soǵyp, uryp-soǵyp jatqanyn aityp úlgergen. Artynsha shabýyldaýshylar onyń telefonyn alyp, jerge laqtyryp, syndyrǵan, al er adam qyzdyń qolynan jibermei ustap turǵan.
Instagram-da jariialanǵan kadrlarda jasóspirim ony jiberýdi ótinip jatqany, al er adam politsiia shaqyrýdy suraǵany kórinedi.
"Politsiiany eshkim shaqyrǵan joq, patrýl ótip bara jatyp, toqtap, birden balany jiberýdi talap etken", - dedi áiel.
Qyzdyń anasy politsiiaǵa aryz jazǵan. Sot-meditsinalyq sarapshylardyń qorytyndysyna sáikes, kámeletke tolmaǵan bala jeńil jaraqat alǵan.
"Pavlodar oblysynyń ákimshilik quqyq buzýshylyq isteri jónindegi mamandandyrylǵan soty eki shabýyldaýshyny da usaq buzaqylyq jasaǵany úshin kináli dep tanyp, er adamdy 10 táýlikke qamaýǵa alý týraly úkim shyǵardy. Sot onyń oqiǵa kezinde jeńil dárejede masań kúide bolǵanyn, sondai-aq buryn alkogoldik ishimdik iship, qoǵamdyq oryndarda turǵyndardy mazalaǵany úshin aiyptalǵanyn eskerdi. Áielge 36 200 teńge aiyppul salyndy", - dep habarlady oblystyq "Semia i deti. Pavlodar" qoǵamdyq birlestigi.
