Pavlodarda QR premer ministri Baqytjan Saǵyntaevtyń qolynan páter kiltin alǵan otbasy pátersiz qalaiyn dep tur, - dep habarlaidy KTK telearnasy. Pavlodarlyq kópbalaly ana Qarlyǵash Tánkeshovaǵa 6 jyl buryn úshemdi dúniege ákelgeni úshin sol kezde oblys basshysy bolǵan Saǵyntaev úsh bólmeli páter syilaǵan eken.
Telearnanyń málimetinshe, 32 jastaǵy Qarlyǵash Tánkeshovanyń 9 jastaǵy Janar esimdi qyzy men Anar, Shynar jáne Nursultan esimdi úshemi bar. Alty jyl buryn osy úshemdi dúniege ákelgende sol kezdegi oblys basshysynyń qolynan úsh bólmeli sý jańa páterdiń kiltin alypty. Endi búginde sol páterden aiyrylý qaýpi tónip tur eken.
"Oblys ákimi sol kezde Baqytjan Saǵyntaev óz qolymen kiltti berip edi. Óte qatty qýandyq. Osy úsh bólmeli úidi berdi. Al endi qazirgi jaǵdaiymyz qolymyzdaǵy qujatty ary qarai sozbai otyr. Eki ortada tepkishtep júr", - deidi kópbalaly ana.
Telearna málimetinshe, bastapqyda úi qujattaryn esh kedergisiz uzartyp kelgen otbasyn qalalyq turǵyn úi-kommýnaldyq sharýashylyq bólimi byltyr qarjy bólimine aýystyrdyq dep qabyldamai qoiǵan. Al qarjy bólimindegiler bolsa, páter qaidan berilse jalǵa alý merzimi sonda sozylady dep keri qaitarǵan. Eki ortada bir jyl sandalǵan otbasy budan soń prokýratýraǵa da barǵan. Biraq ondaǵylar sheneýnikter jalǵa alý qujatyn uzartýdan bas tartpaiynsha, eshteńe jasai almaimyz degendi aitqan.
"Bul bizdiń bólmemiz. Biz bólmemizde oinaimyz, sabaq jazamyz. Biz bólmesiz qalǵymyz kelmeidi", - deidi Tánkeshovanyń qyzy Janar Saǵyndyq.
Al sheneýnikter óz kezeginde máseleni sot arqyly sheshýge keńes berip otyr.
"Atalǵan azamatshaǵa memlekettik kommýnaldyq kásiporyn "GorkomhozZ" dep atalatyn qazynalyq kásiporynǵa resmi túrde aryz jazyp jáne sol jerden resmi túrde jaýabyn alý qajet. Biz qalalyq turǵyn úi komissiiasy óz tarapymyzdan resmi túrde jaýabymyzdy berdik, endi osy eki jaýappen azamatshaǵa qalalyq sotqa shaǵymdaný qajet", - deidi Pavlodar qalasy qarjy bóliminiń bas mamany Erik Slan. Telearna málimetinshe, kópbalaly ana esh jerde jumys istemeidi. Jalǵyz otaǵasynyń jalaqysy men tórt bala úshin beriletin on myń teńgege jýyq járdemaqyǵa qarap otyr. Endi áiel páter kiltin tabystaǵan búgingi premer-ministr Baqytjan Saǵyntaevtyń ózine hat jazýdy kózdep otyr. (Derekkóz: KTK)
