Pavlodar oblysynda An-2 ushaǵy apatqa ushyrady. Saldarynan bir ushqysh qaza taýyp, ekinshi ushqysh aýrýhanaǵa jetkizildi. Oqiǵanyń mán-jaiy anyqtalyp jatyr, dep habarlaidy Tengrinews.kz.
Kólik ministrliginiń málimetinshe, áýe apaty 27 mamyr kúni Pavlodar oblysy Jelezinka aýyly mańynda bolǵan. Ushaq "Jeńil jáne asa jeńil aviatsiia eksplýatanttary" zańdy tulǵalar birlestigine tiesili bolǵan.
Vedomstvo taratqan aqparatqa sáikes, áýe kemesi aviatsiialyq-himiialyq jumystardy oryndap júrgen. Aldyn ala derek boiynsha, ushaq elektr jelilerine tiip ketken bolýy múmkin.
"Ushaq bortynda eki ekipaj múshesi bolǵan. Oqiǵa saldarynan bir pilot qaza tapty. Ekinshi ushqyshty TJD qyzmetkerleri alyp shyqty, ol esin biledi", – delingen habarlamada.
Ministrlik bul aviatsiialyq oqiǵany Kólik ministrliginiń Kóliktegi oqiǵalar men intsidentterdi tergeý departamentiniń mamandary zertteitinin málimdedi. Olar oqiǵa ornyna attanǵan.
Pavlodar oblystyq densaýlyq saqtaý basqarmasynyń málimetinshe, zardap shekken ushqysh Pavlodar qalasyna jetkizilip jatyr.
"1998 jyly týǵan naýqas qazir Jelezin aýdandyq aýrýhanasynan apattar meditsinasy ortalyǵynyń bortymen Pavlodar qalalyq №1 aýrýhanasynyń politravma bólimine jetkizilýde", – dep habarlady basqarma.
Ushaqtyń qulaý faktisi boiynsha Pavlodar stantsiiasyndaǵy kóliktegi politsiia bólimi qylmystyq is qozǵady. Qazir oqiǵanyń barlyq mán-jaiyn anyqtaýǵa baǵyttalǵan qajetti tergeý sharalary júrgizilip jatyr.
