Pavlodar oblysynda qańtar aiynyń basynda terrorizmge jáne bilikti kúshpen basyp alýǵa úndedi degen kúdikpen 3 adam ustaldy, dep habarlaidy QazAqparat Pavlodarnews.kz saityna silteme jasap.
Onlain baspasóz máslihatynda Pavlodar oblystyq Politsiia departamenti basshysynyń birinshi orynbasary Jasqairat Qaiyrov «Qańtar oqiǵasyna» qatysty málimetterdi jariia etti.
«4 qańtarda áleýmettik jelilerge monitoring júrgizý barysynda belgili bir tulǵalar 5 qańtar kúni miting uiymdastyryp, ótkizýge shaqyryp jatqanyn anyqtadyq. 5 qańtar kúni saǵat 14:00-de 1500-den astam adam ortalyq alańǵa keldi. Olardyń uiymdasqany baiqalady. Olar jergilikti atqarýshy organdarǵa óz talaptaryn aitty. Oblys jáne qala ákimi aldaryna shyǵyp, talaptaryn tyńdady», - dedi Jasqairat Qaiyrov.
Alaida, jergilikti atqarýshy organ ókilderi sóilep jatqan kezde oblystyq ákimdik ǵimaratyn kúshpen basyp alýǵa úgittep, aiqailaǵan daýystar shyǵa bastaǵan.
«Saǵat 17:00 shamasynda olar oblys ákimdigi ǵimaratynyń qorshaýyn buzyp ótip, politsiia qyzmetkerlerine tas, taiaq, bótelkeler laqtyrdy. 15 minýt ishinde ákimdikke kireberis esiktegi metalloplastikalyq qorǵanysty syndyrdy. Shyny esikterdi syndyrý arqyly ákimdiktiń front ofisine kirdi. Bul kezde ákimdiktiń kire berisinde politsiia qyzmetkerleri turǵan bolatyn. Taǵy da qosymsha kúshtiń kelýimen kirgen top yǵystyryldy», - dedi Jasqairat Qaiyrov.
Jappai tártipsizdikti boldyrmaý maqsatynda arnaiy jospar qurylyp, ári qarai Ulttyq ulan áskeri jinalǵandardy Abai eskertkishine qarai yǵystyryp, psihologiialyq áser etý úshin jaryqtyq-shý granatalaryn qoldanǵan. Sodan keiin agressivti topty Qaiyrbaev – Máshhúr Júsip, Sátbaev – Toraiǵyrov kósheleriniń qiylysyna deiin shegindirý múmkin bolǵan.
«Qaraqshylyqqa jol bermeý úshin politsiia kúzetteri saýda úileriniń mańynda ornalastyryldy. Qarjy operatsiiasy úzdiksiz júrip turý maqsatynda bankter men bankomattar kúzetke alyndy, qalalyq jáne aýyldyq jerlerde qolma-qol aqsha bolýy úshin inkassatorlarǵa ilesip júrý júzege asyryldy», - dedi Jasqairat Qaiyrov.
Málim etilgendei, «qańtar oqiǵasy» kezinde arnaiy operatsiianyń birinshi kúni 150 adam ustalyp, olar qosalqy irikteý pýnktine jiberilgen.
«Pavlodar qalasyndaǵy sotqa mitingige qatysqandarǵa qatysty 1282 materialy jiberildi. 324 adam 15 táýlikke deiin qamaýǵa alyndy. Ekibastuz qalasy men Baianaýyl aýdanynda qoǵamdyq tártipti buzýǵa jol berilgen joq», - dedi Qaiyrov.
Jasqairat Qaiyrovtyń aitýynsha, Pavlodarda qańtardaǵy mitingini uiymdastyrdy degen kúdikpen 3 adam anyqtalǵan. Olarǵa qatysty 2 qylmystyq is qozǵaldy.
«Tergeý júrip jatqandyqtan mán-jaiyn ashyp aita almaimyn. 3 uiymdastyrýshyǵa qatysty QR QK 255-baby «Terrorizm aktisine» qatysty jáne 179-baby «bilikti basyp alýǵa áreket jasaý jáne soǵan shaqyrý» boiynsha tergeý júrgizilýde», - dedi Jasqairat Qaiyrov.
Departament basshysynyń birinshi orynbasary miting kezinde eshbir politsiia qyzmetkeri jáne kóligi zardap shekpegenin atap ótti.
