Pavlodar oblysyna barǵan «Nur Otan» partiiasy Tóraǵasynyń Birinshi orynbasary Muhtar Qul-Muhammed óńirdegi memlekettik baǵdarlamalardyń júzege asý barysymen tanysty. Sonyń ishinde oblysta «Rýhani jańǵyrý» boiynsha atqarylyp jatqan jumystar kóńil qýantady. Osyǵan orai Muhtar Qul-Muhammed Pavlodar memlekettik pedagogikalyq institýty janyndaǵy «Margulan center» ǵylymi ortalyǵynda arnaiy boldy.
Ortalyqta XVIII ǵasyrda Qazaq handyǵynyń kórnekti memleket qairatkeri bolǵan Sultanbet sultannyń ordasy qaita qalpyna keltirilgen. Bul jumystar arhivterden tabylǵan sultan ordasynyń túpnusqa jobasy boiynsha júrgizilip, orda aǵashtan salynǵan. Sultanbet sultan jońǵar shapqynshylyǵy kezinde qalyń qol bastaǵan qolbasshy, Resei jáne Qytaimen aradaǵy máselelerdiń oń sheshilýine tikelei qatysqan mámileger bolǵan. Sondai-aq ortalyqta «Rýhani jańǵyrýdy» júzege asyrý jónindegi «Nur Otan» partiiasy Pavlodar oblystyq filialynyń jobalyq keńsesi ornalasqan.
Sonymen qatar «Nur Otan» partiiasy Tóraǵasynyń Birinshi orynbasary Pavlodar tústi metallýrgiia kolledjinde bolyp, stýdenttermen kezdesti. Onda Muhtar Qul-Muhammed latyn álipbiine kóshý máselesine toqtalyp, jastar úshin bul bastamanyń eshqandai qiyndyq týdyrmaitynyna nazar aýdardy. Odan bólek, Muhtar Abraruly Pavlodar oblysynda Elbasynyń Qazaqstandy úshinshi jańǵyrtý jóninde naqty mindetteriniń oryndalý barysymen tanysty. Soǵan orai «Pavlodar» arnaiy ekonomikalyq aimaǵynda ornalasqan «Gissenhaýz» jáne «AgroHimProgress» zaýyttarynda boldy.
Atalǵan kásiporyndardyń jumysymen tanysqan «Nur Otan» partiiasy Tóraǵasynyń Birinshi orynbasary Pavlodar óńiriniń osynshalyqty qarqyndy damýy Elbasymyzdyń eren eńbeginiń jemisi ekenin aitty. Bul jóninde Muhtar Qul-Muhammed: «Elbasymyzdyń airyqsha qamqorlyǵynyń arqasynda Pavlodar oblysynyń ekonomikalyq, áleýmettik jáne rýhani damýynda orasan zor órleý oryn alýda. Tek indýstrialdy-innovatsiialyq damý baǵdarlamasy boiynsha óńirde 35 iri ónerkásip orny ashylyp, oǵan 1 trillion teńgeden astam qarajat bólindi. «Nurly jol» baǵdarlamasy boiynsha keiingi eki jylda ǵana oblysqa 125 mlrd. teńge qarjy jumsalǵan. Mundai qarqyndy damý óńir tarihynda buryn-sońdy bolǵan emes. Oblysta balabaqsha, mektep máselesi de birjolata sheshilgen. Halqymyzǵa qazaq ǵylymy men ádebietiniń aitýly qairatkerlerin bergen óńirde «Rýhani jańǵyrý» boiynsha da kóptegen jobalar júzege asýda. Pavlodarlyqtar Elbasynyń osy qamqorlyǵyn baǵalai bilýi kerek», – dedi.
