Pavlodarda órtten qaza bolǵan bir jasar balaǵa qatysty oqiǵanyń jai-japsary aityldy, - dep habarlaidy Tengrinews.kz agenttigi.
Qaiǵyly oqiǵanyń jai-japsaryn Pavlodar oblysy Tótenshe jaǵdailar departamentiniń baspasóz qyzmeti málimdedi. Vedomstvo málimetinshe, órt kezinde qaza bolǵan sábi, onyń 14 jastaǵy ápkesi men 5 jasar aǵasy úide jalǵyz bolǵan. Órt olardyń otqa abaisyz qaraýynan sebep bolǵan. Oqiǵaǵa qatysty sotaldy tergeý bastaldy.
"Balalar oryndyqtar men kreslolardan otyratyn jer jasap, ishin qarańǵylap, shyraq jaqqan. Sosyn úlken bala shamdy alyp ketip bara jatqanda shyraqtyń ushqyny basqa bir jerge tiip órt tutanǵan. Alaida balalar jalyndy baiqamai ekinshi qabatqa shyǵyp uiyqtap qalǵan", - dep habarlady Pavlodar qalasynyń Tótenshe jaǵdailar departamentiniń baspasóz qyzmeti.
Vedomstvo basshysy, órtten balalardyń úlkeni oianǵanyn, biraq bir jasar inisin taba almaǵanyn, keiin ózderi kóshege júgirip shyqqanyn aitady. Al kishkentai sábidiń birinshi qabatqa qalai túskenin eshkim bilmeidi.
"Órttiń shyǵýyna balalardyń otqa abaisyz qaraýy sebep boldy. Osy fakt boiynsha 292-bap "Órt qaýipsizdigi talaptaryn buzý" boiynsha sotaldy tergeý amaldary júrgizilip jatyr", - dep atap ótti Pavlodar qalalyq TJD-niń ókili.
Eske salaiyq, Pavlodarda jeke úiden shyqqan órtten bir jasar sábi tiridei órtenip ketken bolatyn.
Órt týraly habarlama "101" pýltine 10 jeltoqsanda saǵat 17:57-de túsken. Pavlodar oblysy Tótenshe jaǵdailar departamentiniń baspasóz qyzmetiniń málimetinshe, eki qabatty kirpishten qalanǵan jeke turǵyn úidiń birinshi qabatynda eki kreslo, biik oryndyq, kilem, sondai-aq ekinshi qabatqa aparatyn aǵash baspaldaq órtengen.
