Pavlodar oblysy Áýelbek aýyldyq mektebinde temperatýralyq rejim qalpyna keltiriledi. Bul jóninde oblys ákiminiń baspasóz qyzmeti málim etti, dep habarlaidy QazAqparat.
Áleýmettik jelilerde paida bolǵan oqý ornynyń nashar jylýy týraly shaǵymdardan keiin Pavlodar oblysynyń ákimi Ábilqaiyr Sqaqov Aqtoǵai aýdanyndaǵy mektepke bardy.
Búginde munda 40 tonna kómir qabyldanyp, temperatýralyq rejimdi qalpyna keltirýge kiristi.
Óńir basshysy oqý ornynyń birneshe kabinetteri men sport zalyn aralap shyqty.
Aqpannyń 21-i kúni tańerteń mektep aýmaǵynda aýa temperatýrasy 15 gradýsty qurady.
Bilim oshaǵynyń ákimshiligi sol kúni mektep ishindegi temperatýralyq rejimdi ońtaily deńgeige jetkizemiz dep sendirdi.
- Ótken aptanyń basynan beri kómir jetkizýshimen kelissóz júrgizip jatyrmyz, - dedi Aqtoǵai aýdanynyń ákimi Qarshyǵa Arynov. – Ol qatty otyndy juma kúni jetkizemiz dep ýáde bergen, biraq ótinishti oryndamady. Bizge bólmelerdi qolda bar kómir qaldyqtarymen jylytýǵa týra keldi.
Belgili bolǵandai, kómir jetkizýshimen bir aidan astam ýaqyt boiy sot protsesi júrip jatyr.
Bul rette oblys deńgeiinde bilim oshaǵynyń salqyn bolý qaýpi bar ekeni eshkimge eskertilmegen.
- Bul mektepte qalyptasqan jaǵdai biýrokratiia men nemquraidylyqtyń úlgisi bolyp tabylady, - dedi Pavlodar oblysynyń ákimi. - Kómir jetkizýshimen sottasyp jatqanda, balalar tońyp júr. Bul rette jergilikti atqarýshy organdardyń eshqaisysy bul máseleni bilim basqarmasyna da, oblys ákimdigine de habarlamaǵan. Nege bári únsiz otyrǵan? Kómir óndiretin aimaqta turyp, kómirmen qamtamasyz etý máselesin tezirek sheship, balalardy nazardan tys qaldyrmas edik qoi.
Ábilqaiyr Sqaqov Aqtoǵai aýdanynyń basshysy Qarshyǵa Arynovqa jáne bilim basqarmasynyń basshysy Dinislam Bolathanulyna qatań sógis jariialady.
Sonymen qatar, bilim oshaǵyndaǵy bolǵan jaǵdaiǵa bailanysty basqa da kináli laýazymdy tulǵalarǵa da sheshim qabyldaýdy tapsyrdy.
