Pavlodar oblystyq Tótenshe jaǵdailar departamenti mektep avtobýsy men órt sóndirý kóliginiń soqtyǵysýyna qatysty oqiǵaǵa túsinik berdi, dep habarlaidy QazAqparat.
«Saǵat 14:02-de «101» nómirine Shyǵys ónerkásip aimaǵy kóshesi, 905 mekenjaiynda órt shyqqany týraly habar tústi. Jeke turǵan temir-beton garajynda 20 sharshy metr aýmaqty qamtityn jihazdar, úi zattary órtengen», - dep habarlady Pavlodar oblystyq Tótenshe jaǵdailar departamentiniń baspasóz qyzmetinen.
Órt 15:45-te aýyzdyqtaldy. Oqiǵa ornynda jeke quramnyń 18 adamy jáne 7 tehnika jumys istedi, dedi vedomstvodan.
Pavlodardyń Shyǵys ónerkásip aimaǵy №4 órt sóndirý bólimine jaqyn ornalasqan, sondyqtan oqiǵa ornyna osy bólimdegi kúshter jiberildi. KamAZ bazasyndaǵy 5 tonnalyq jáne 8 tonnalyq avtotsisternalar oqiǵa ornyna dereý shyqty.
«Shedrin-Elgin kósheleriniń qiylysynda shaqyrý jolynda № 43 jalpy orta bilim berý mektebiniń oqýshylaryn tasymaldaityn PAZ avtobýsymen 8 tonnalyq órt avtotsisternasy soqtyǵysty.
Avtotsisterna Elgin kóshesi boiymen kele jatyp kók nemese qyzyl tústi jarqyldaýyq maiagyn jáne arnaiy dybys signalyn iske qosqan. Órt sóndirý kóligi baǵdarshamnyń qyzyl túsi janǵanda júrip kele jatqan. Shedrin kóshesindegi PAZ avtobýsy oǵan jol bermesten qozǵalysyn jalǵastyryp, órt sóndirý kóligin soqqan. Osy ýaqytta avtobýsta orta jalpy bilim berý mektebiniń oqýshylary bolǵan. Avtobýsta jalpy 8 adam otyrdy. Barlyq oqýshylar oblystyq balalar aýrýhanasyna jetkizildi», - dedi TJD-dan.
Jol-kólik oqiǵasynyń mán-jaiy anyqtalyp jatyr, dedi qutqarýshylar.
