Pavlodar qutqarýshylary shuńqyrǵa qulap ketken 11 jasar balany aman alyp shyqty, dep habarlaidy QazAqparat Pavlodarnews.kz saityna silteme jasap.
Oqiǵa oblys ortalyǵyndaǵy Jeltoqsan kóshesi, 151 mekenjaiynda ornalasqan jeke úidiń aýmaǵynda bolǵan.
Pavlodar oblystyq Tótenshe jaǵdailar departamenti baspasóz qyzmetiniń málimetinshe, 13 qazan kúni túngi saǵat 22:27-de «112» pýltine oqys oqiǵa týraly habarlama kelip túsken.
«Oqiǵa ornyna 4 qutqarýshy, 1 tehnika bardy. Qutqarýshylar kelgen boida shuńqyrǵa túsip, alpinistik qural-jabdyqtardyń kómegimen balany shyǵaryp aldy. Bala jedel túrde «103« qyzmetine tapsyrylyp, oblystyq balalar aýrýhanasyna jatqyzyldy», - delingen baspasóz habarlamasynda.
Osy oraida, tótenshe jaǵdailar departamentiniń mamandary kezdeisoq shuńqyrǵa túsip ketken adamǵa kómektesetin birneshe qarapaiym erejeler bar ekenin eske salady.
«Bul jaǵdaida úreige berilmeý kerek. Qatty qozǵalys jasamańyz. Eger sizde telefon bolsa, dereý qutqarý qyzmetine «112« jáne «101« nómirleri boiynsha qońyraý shalyńyz. Al uialy telefon bolmaǵan jaǵdaida aiǵailap, kómekke shaqyryńyz», - deidi mamandar.
