Pavlodarda "Pavlodar munai-himiia zaýyty" JShS-niń burynǵy basshylyǵyna sot úkimi shyqty. Sottalǵandar arasynda kásiporynnyń burynǵy bas direktorlary Ospanbek Álseiitov pen Shýhrat Danbai da bar. Qyzmettik ókilettigin asyra paidalanǵandary úshin olarǵa 3 jyl 6 ai merzimge bas bostandyǵyn shekteý jazasy belgilendi, - dep habarlaidy Tengrinews.kz agenttigi.
Sot Pavlodar munai-himiia zaýytynyń eki burynǵy bas direktory men top-menedjerine qatysty qylmystyq isti qysqartylǵan tártipte qarady.
Is materialdaryna sáikes, sottalýshylar 2017 jyldan bastap 2022 jyldyń aqpan aiyna deiingi aralyqta zaýyttyń laýazymdy tulǵalary bola tura, alaiaqtyq jáne qyzmettik ókilettikterin asyra paidalaný arqyly zaýyttyń atynan memleketke 753 million 189 myń 541 teńge zalal keltirgen.
"Sottalýshylardyń árqaisysy ózderine taǵylǵan qylmystyq quqyq buzýshylyqty jasaýdaǵy kinálaryn tolyq moiyndady, keltirgen zalalyn tolyq ótei otyryp, jasaǵan isterine ókindi", - dep atap ótti sottyń baspasóz qyzmeti.
Sot Ospanbek Álseiitov pen Shýhrat Danbaidy Qylmystyq kodekstiń 361-baby, 4-bóligi, 3-tarmaǵy "Aýyr zardaptarǵa ákep soqqan ókilettikterdi teris paidalaný" boiynsha kináli dep tanyp, 3 jyl 6 ai merzimge bas bostandyǵyn shekteý jazasyn taǵaiyndady.
Al úshinshi aiyptalýshy Erjan Ataqulov asa iri kólemde alaiaqtyq jasaǵany úshin shartty túrde 5 jylǵa sottaldy. Sonymen qatar, ol 10 jyl merzimge qarjy jáne kommertsiialyq uiymdarda basshylyq qyzmetterdi atqarý quqyǵynan aiyryldy.
Sottalǵandarǵa probatsiialyq baqylaý belgilenedi. Olarǵa turaqty turǵylyqty jerin, jumysyn eskertýsiz ózgertýge, meiramhanalar men basqa da oiyn-saýyq oryndaryna barýǵa tyiym salynady.
