9 sáýir kúni COVID-19 aýrýynan emdelip shyqqan azamatpen bailanysta bolǵan 154 adamnyń bári de baqylaýdan bosatyldy. Bul týraly Pavlodar oblysynyń densaýlyq saqtaý basqarmasynyń basshysy mindetin atqarýshy Birjan Dosmaiylov málim etti, dep habarlaidy QazAqparat.
«9 sáýir kúni koronavirýs infektsiiasyn juqtyrǵan taǵy 2 adam tirkeldi. Ókinishke qarai, bireýi kóz jumdy. Qaitys bolǵan kisi 1936 jyly týǵan. Pavlodar turǵyny. Ol 8 sáýirde aýrýhanaǵa túsken. Sol kúni er adamnan koronavirýs boiynsha test alynǵan edi. Kelesi kúni onyń koronavirýsty juqtyryp alǵany belgili boldy. Er adam bronha demikpesimen, ókpeniń sozylmaly aýrýy, júrektiń ishemiialyq aýrýymen, úshinshi dárejeli arteriialyq gipertenziiamen jáne kókirek terisiniń qaterli isigi diagnozdarymen esepte turǵan», - dedi Birjan Dosmaiylov Pavlodar qalasynda onlain rejimde ótken óńirlik kommýnikatsiialar qyzmetiniń baspasóz máslihatynda.
Onyń aitýynsha, kóz jumǵan qariiamen bailanysta bolǵan 118 adamnyń 50-i aýrýhanaǵa jatqyzylyp, 65-ne úi karantini tártibi mindettelgen.
«Ekinshi naýqas – 1981 jylǵy Pavlodar turǵyny. 8 sáýirde KVI belgilerimen juqpaly aýrýlar emhanasyna jedel járdemmen jetkizilip, jatqyzyldy. Qazirgi kezde onyń jaǵdaiy turaqty. Emdelýshiniń aitýynsha ol 21 naýryzdan bastap Qazaqstannyń birneshe qalasynda, sonyń ishinde Qaraǵandy, Shymkent, Taraz qalalaryna barǵan. Onymen bailanysta bolǵan 158 adam anyqtaldy. Olardyń 6-y statsionarlyq karantinge jatqyzylyp, 24 adam úi karantinin saqtaýǵa mindetteldi. 38 adam basqa óńirlerdiń turǵyndary. Olar týraly málimet oblystardyń tiisti mekemelerine jiberildi», - dedi ol.
Birjan Dosmaiylov keshe Pavlodar oblysynda bir adamnyń KVI-dan emdelip shyqqanyn da eske saldy.
«1988 jylǵy Aqsý qalasynyń turǵyny emdelý kýrsynan ótip, jazylǵannan keiin turaqty mekenjaiy boiynsha úi karantinine jiberildi. Onymen bailanystaǵy 154 adamnyń bári baqylaýdan bosatyldy», - dedi ol.
Eske sala ketsek Pavlodar oblysynda koronavirýs indetinen bir adam kóz jumǵany keshe habarlanǵan bolatyn. Ol 1936 jyly dúniege kelgen.
