Perizat Qairattyń naǵashy aǵasynyń otbasy Dýbaida jalpy quny 5,9 mln dollarǵa nemese shamamen 2,67 mlrd teńgege baǵalanǵan jeti jyljymaityn múlikke ielik etetini anyqtaldy, dep habarlaidy ult.kz "Vyhod k moriý" Telegram arnasyna silteme jasap.
Derekke sáikes, páterlerdiń barlyǵy Qazaqstan azamaty Gúlbaný Alashbaevanyń atyna rásimdelgen. Ol Perizat Qairattyń anasy Ǵaini Alashbaevanyń týǵan aǵasy Sábit Alashbaevtyń jubaiy.
Dýbaidaǵy jyljymaityn múlik tizilimine sáikes, Alashbaevtar bul nysandardy 2020-2022 jyldary satyp alǵan. Bul kezeń Perizat Qairattyń qoǵamdyq qyzmeti bastalǵan ýaqytpen tuspa-tus keledi.
Sábit pen Gúlbaný Alashbaevtardyń Qazaqstanda iri kásipkerlik aktivteri joq. Olardyń atyna Astana men Aqtóbede eki jeke kásipkerlik tirkelgen, al ózderi rieltor bolyp jumys isteidi.
Basylym málimetinshe, Gúlbaný Alashbaevanyń atyna Dýbaida myna nysandar tirkelgen:
- Forte Tower II keshenindegi eki bólmeli páter. Aýmaǵy – 116,31 sharshy metr. Qazirgi baǵasy – 878,6 myń dollar;
- Vida Dubai Mall Tower II keshenindegi bir bólmeli páter. Aýmaǵy – 74,8 sharshy metr. Baǵasy – 750 myń dollar;
- Sol keshendegi eki bólmeli taǵy bir páter. Aýmaǵy – 105,63 sharshy metr. Baǵasy – 1,12 mln dollar;
- Bellevue Towers keshenindegi úsh bólmeli páter. Aýmaǵy – 119,59 sharshy metr. Baǵasy – 735 myń dollar;
- Azure Residence keshenindegi aýmaǵy 106 sharshy metr bolatyn eki bir bólmeli páter. Ekeýiniń jalpy quny – 1,65 mln dollar;
- Harbour Views keshenindegi eki bólmeli páter. Aýmaǵy – 106,16 sharshy metr. Baǵasy – 780 myń dollar.
Buǵan deiin Alashbaevaǵa tiesili bolǵan Acacia at Park Heights keshenindegi páter qysqa merzimdi jalǵa berýge shyǵarylǵan. Jarnamada bailanys retinde onyń elektrondy poshtasy kórsetilgen. Bul páterdi otbasy 2020 jyly 380 myń dollarǵa satyp alǵan. Keiin nysan satylǵan, alaida mámileniń naqty somasy belgisiz.
Perizat Qairattyń isi boiynsha 2025 jyly sot ony 10 jylǵa, al anasy Ǵaini Alashbaevany 7 jylǵa bas bostandyǵynan aiyrǵan. Sot olardy Biz Birgemiz Qazaqstan qorynyń 3,5 mlrd teńgesin jymqyryp, zańdastyrdy dep tanyǵan.
Olardyń múlki tárkilenip, jalpy quny shamamen 900 mln teńge bolatyn tórt páter, qymbat kólikter, bank shottaryndaǵy qarajat, áshekei buiymdar, brendtik kiimder men sómkeler memleketke ótken.
Basylym Dýbaidaǵy páterlerdiń keiin tárkilenýi múmkin ekenin joqqa shyǵarmaidy. Sonymen qatar avtorlar bul jyljymaityn múlik Alashbaevtardyń rieltorlyq qyzmetten tapqan komissiialyq tabysyna satyp alynýy múmkin ekenin de atap ótken. Alaida bul nusqa ázirge rastalmaǵan.
