Foto: time.kz
Sanitarlyq tekseris nátijesi boiynsha perzenthana ǵimaraty apatty dep tanylǵan. Emdeý mekemesi tolyǵymen oblystyq perinataldyq ortalyqqa kóshiriledi, dep habarlaidy Ult.kz Kazinform-ǵa silteme jasap.
Oblys ortalyǵyndaǵy № 1 qalalyq aýrýhana janynda oryn tepken qalalyq perzenthana óz jumysyn toqtatady. Ǵimarattyń tozyǵy jetkeni sebepti, ony ári qarai paidalaný qaýipti dep tanylǵan.
Perzenthana 1988 jyly salynǵan. Sońǵy júrgizilgen sanitarlyq tekseris ǵimarattyń apatty jaǵdaida turǵanyn anyqtaǵan.
№ 1 qalalyq aýrýhana basshysynyń hirýrgiia jónindegi orynbasary Azamat Qaitaevtyń aitýynsha, 2024 jyly perzenthana bólimshesinde bosaný sany 21%-ǵa azaiǵan. Sondai-aq, tósek-orynnyń naqty júktemesi 26,7%-ǵa kemigen. Kórsetkishterdiń tómendeýi qarjyny tiimsiz paidalanýǵa ákeletini anyq. Sońǵy jyldary bul ǵimaratta kúrdeli jóndeý jumystary da júrgizilmegen.
— Tehnikalyq saraptama qorytyndysy boiynsha ǵimaratty paidalanýǵa ruqsat tek 2025 jylǵa deiin berilgen. Búginde munda 160 adam jumys isteidi. Onyń 55-i Pavlodar oblystyq perinataldyq ortalyǵyna aýysady. Qalǵandary basqa bólimder men óńirlik aýrýhanalarǵa jumysqa ornalasady. Eger usynylǵan jumystan bas tartsa, zańǵa sai ótemaqy tólenedi. Perinataldyq ortalyqta mundai kómek kórsetýge tolyq múmkindik bar. Ortalyqtyń qarjylyq resýrsy, keń ǵimaraty jáne qajetti tehnikalyq jabdyqtary jetkilikti. Qazirgi kezde qyzmetkerlerdy aýystyrý, qural-jabdyqtardy kóshirý jumystary bastalyp ketti. Bul jumystar 1 maýsymǵa deiin tolyq aiaqtalady dep kútilip otyr, — deidi Azamat Qaitaev.
