Pavlodarda áleýmettik jeli arqyly alaiaqtyq jasady dep kúdikke ilingen qylmystyq top áreketiniń joly kesildi, dep habarlaidy "Ult aqparat".
Is-shara barysynda Pavlodarda internette alaiaqtyq jasady degen kúdikpen Pavlodar qalasynyń eki turǵyny ustaldy.
Pavlodarlyq alaiaqtar mynadai syzba boiynsha jumys jasaǵan: olar internette (Kolesa jáne OLX veb-saittary) avtomobil bólshekterin arzan baǵamen satatyny týraly jarnama jariialaidy. Tapsyrys qabyldap, taýardyń tolyq somasyn bank kartasyna aldyn ala tóleýdi suraidy jáne tapsyrys berilgen taýardy kýrer arqyly jiberýge ýáde berdi. Aqshany alǵan soń qaskúnemder biraz ýaqyt kýrerdiń nashar jumysyn syltaýratyp, ýaqyt sozady da, keiin telefondy tolyq óshiredi.
Qazirgi ýaqytta 10 adam alaiaqtarǵa aldanǵan. Sátsiz taýar satyp alý kólemi 40-100 myń teńge aralyǵynda boldy.
Kúdiktilerdiń biri Pavlodardaǵy ýaqytsha ustaý izoliatoryna qamaldy.
Atalǵan fakti boiynsha QR QK 190-babymen qaralǵan sotqa deiingi tergeý júrip jatyr.
